Mizoram Bru-te enfiah thawh hnihnnaah Chhungkaw 98-a mi 501 chhinchhiah tawh
Mizoram Bru, Tripura relief camp-a awm mekte Mizorama hruai kîrna turin tunlai hian Mizoram sorkarin a hmunah enfiah hna thawh hnihna a thawk mek a; July 8, 2019 thleng khan chhungkaw 98-a mi 501 chhinchhiah an ni tawh.
Tarlan tawh angin, Tripura refugee camp-a Bru awmte chungchang ngaihtuah tura din Joint Monitoring Group (JMG) member-te June thla khan Ministry of Home Affairs pisaah an ṭhukhawm a; Tripura-a Bru refugee camp-te chu October 1, 2019-a tihtawp rêlin, chumi hma chuan Mizorama hruai kîr turin thu tihtluk a ni.
Bru-te Mizorama lak lêtna atan hian Mizoram sorkar chuan July 3, 2019 aṭang khan relief camp-ah endik hna an thawk ṭan. Mizoram khua leh tui dik tak, Tripura a awm mekte chu tluang taka endik mek zel niin, July 8, 2019 thleng khan chhungkaw 98-te an enfiah tawh a, chutah chuan mi 501 an awm.
Mamit DC Office (Bru Cell)-in report an dawn danin, tun ṭuma Bru endiknaa chhinchhiah zinga tam ber chu Mamit district mi an ni a, chhungkaw 86-a mi 431 an ni. Kolasib district mi chhungkaw pakuaa mi 49 leh Lunglei district-a mi chhungkaw pathuma mi 21 an chhinchhiah bawk.
Refugee camp-a awm mek Bru-te chu kum 2016 khan enfiah an lo ni tawh a, chumi ṭum chuan camp paruk aṭanga Mizorama hruai kîr tura an chhinchhiah zat chu chhungkaw 1,438-a mi 9,180 an ni. Tarlan tawh angin, tun hnaia Joint Monitoring Group meeting, MHA special secretary (Internal Security) Dr AP Maheswari kaihruai chuan, Tripura-a Bru camp-te chu October 2019 aṭangin tihtawp an tum a, refugee camp-a ṭanpuina pek ṭhin zawng zawng pawh tihtawp an rêl. September 2019 chhung ngeia Mizoram mite la let turin Mizoram sorkar hotute leh Mizoram Bru Displaced People Forum (MBDPF) hruaitute a hriattir a ni.
Hetih lai hian, July 3, 2018-ah khatih laia Union Home minister Rajnath Singh hriatpuiin Home Ministry, Mizoram sorkar, Tripura sorkar leh MBDPF ten inremna, draft agreement an lo siam tawh. Draft agreement ang chuan, Mizoram Bru-te chu September 31, 2018-ah chuan Mizoramah hruai kîr vek tur an ni a, Bru refugee camp-te pawh October 2018 aṭangin tihtawp tura tih a ni. Mahse, hengte hi tihpuitlin a ni lo vek thung.
Sorkar laipui chuan Bru camp-a awmte chu October 1, 2018 aṭangin ration leh ṭanpuina hrang hrang a pek ṭhinte tihtawp turin a ti bawk a; Draft Agreement angin hun rei lo te chhung chu ṭanpuina tihtawp a ni a, mahse, a hnu lawkah pek chhunzawm leh an ni.
Bru endiknaa chhinchhiah zat
Mamit District : Chhungkua 86-ah mi 431
1. Kaiskau : Chhungkaw 34-ah mi 171
2016 format-a endik thar : Chhungkaw 2-ah mi 8
2. Khakchangpara : Chhungkaw 3-ah mi 22
2016 format-a endik thar : Chhungkaw 12-ah mi 56
3. Hamsapara : Chhungkaw 23-ah mi 104
2016 format-a endik thar : Chhungkaw 7-ah mi 41
4. Asapara : Chhungkaw 1-ah mi 8
2016 format-a endik thar : Chhungkaw 1-ah mi 4
5. Naisingpara : Chhungkaw 3-ah mi 17
6. Hazachera : NIL
TOTAL : Chhungkua 64-ah mi 322
2016 format-a endik chhungkua 22-a mi 109
Kolasib District : Chhungkua 9-ah mi 49
1. Kaskau : Chhungkaw 4-ah mi 24
2. Khakchangpara : NIL
2016 format-in chhungkaw 1-ah mi 5
3. Hamsapara : Chhungkaw 4-ah mi 20
4. Asapara : NIL
5. Naisingpara : NIL
6. Hazachera : NIL
Lunglei District : Chhungkaw 3-ah mi 21
1. Kaskau : NIL
2. Khakchangpara : NIL
2016 format-in chhungkaw 3-ah mi 21
3. Hamsapara : NIL
4. Asapara : NIL
5. Naisingpara : NIL
6. Hazachera : NIL