KHAWTHLIR

Tun hnaia Aizawl District Magistrate thupek bawhzuiin Mizoram police-te chuan Aizawla dan loa petrol zuarte an endik ṭhin a, nimin thleng khan dan loa petrol zuar mi 14 an man tawh a, petrol litre 271 an man sak. Petrol zuarte lakah hian police-te chuan thubuai an siamsak ṭhin. Petrol dan loa zawrh an manna hmunte chu - Treasury Square-a MIZOFED pump bulah mi pariat, Edenthar Vengah mi pathum, Vaivakawn Zohnuaiah mi pahnih leh Hunthar Vengah mi pakhat an ni.

National Highways & Infrastructure Development Corporation Ltd (NHIDCL) chuan nimin khan Synod Hospital-ah a thlawna mit entirna, free eye testing camp an buatsaih a, mi 80-te mit enfiahsakin, tarmit mamawhte hnenah a thlawnin tarmit an pe. NHIDCL hi Ministry of Road Transport & Highways hnuaia Aizawl leh Tuipang inkara NH-54 kawngpui zauh hna thawktute an ni a; Vairengte-Sairang road, Seling-Champhai road, Kawlkulh-Tuivai Road leh Lunglei -Tlabung road atan DPR an buaipui bawk.

National Students' Union of India (NSUI), Mizoram State chuan thuchhuah siamin, Mizoram sorkara college pakuate hman tur bus July 9, 2019-a pek a ni ta chu lawmawm an tih thu an tarlang. Bus pakuate chu Lal Thanhawla kaihhruai Congress party sorkar laia NEDP aṭanga pek tura ruahman a nih thu sawiin NSUI chuan, "College bus pek a nih bakah, NEDP aṭangin college hrang hrangah zirlaite mamawh leh college mamawh tam tak leina tur sum ruahman sa pek chhuah tawh a ni," an ti.

Integrated Diseases Surveillance Programme (IDSP) chuan nimin khan Mamit Chief medical Officer pisaah Mamit khawpui chhunga MJA member-te leh tlawmngai pawl hrang hrangte tan 'Awareness campaign on Ricketsial Infection including Scrub Typhus' an buatsaih. rannung seh natna chungchang inzirtirnaah hian, natna tihrêm dan tur hrang hrang leh vei lo tura inven dan turte zirho a ni.