Tun hnaiah heroin ti an pung Ṭan lak a ngai - Central YMA

Central YMA Kumpuan Committee leh Supply Reduction Service (SRS) mite chuan, tun hnaiah heroin ti thar an pun thu Vanglaini palai zawhna chhangin an sawi a, "Ṭan lak a ngai khawp mai," an ti.

CYMA Kumpuan Committee chairman R Lalngheta, CYMA vice president chuan, "Heroin hrim hrim hi a tam khawp a, SRS, Police leh Excise-a thawktute an ṭang a, an man tam hle a ni," a ti a; zir chianna a awm loh avangin heroin ti an pun chhan an hriat theih bik loh thu a sawi.

CYMA Kumpuan Committee leh SRS member-te sawi danin, heroin ti thar zingah kum lama naupang deuh an tam. Ruihhlo ti tharte chu chhûn khaw ên laiin an inlan tam lo a, zan lamah heroin lei tur an zawng tlangpui. Heroin zuar pawh an pung a, a chhan ber pakhat chu - heroin ti ṭhin, anmahni ta tur hlêp tuma zuar chhawng an tam vang a ni.

Myanmar aṭangin Mizoram kal tlangin heroin tam tak Lailapur leh Bagha (Assam) lamah phurh tlang a ni a, Assam lam aṭangin Mizoramah a rawn lut chho ve leh ṭhin. Zu zawrh tihtawp hnuah hian Rangvamuala zu zuar ṭhin tam tak chuan heroin an zuar a, ṭhenkhat chuan zu leh heroin an zuar kawp bawk niin Central YMA hruaitute chuan an sawi.

Tun ṭuma ruihhlo doa hma la mek SRS batch-te chuan heroin leh ruihhlo man tam hrim hrim aiin, a zuar ṭhinte'n an zawrh lohna atana ṭan lak kawngah thâ an thawh ngawrh zual a; ruihhlo vanga an mante chu Police leh Excise-ah an pek bakah, home-ahte an dah ṭhin.

Supply Reduction Service (SRS)-te hian zu an vai ngai lo a, chutihrual chuan, ruihhlo dang man tura an thawh chhuahna lama zu kaihhnawih man tur an hmuh chuan an man ve ṭhin thung. CYMA hruaitu ṭhenkhat Vanglaini palaiin a kawmte chuan, heroin ti an tam chhan chu zir chian ni se an duh thu an sawi a, "Zir chianna a awm miau loh avangin zu zawrh tihtawp vang kan ti ngam lo. Heroin ti thar hi an tam a, a chhan zir chian theih ni se a duhawm khawp mai," an ti. 

Central YMA chuan an hnuaia ruihhlo do tura an din SRS chu hun eng emaw chen chhan hrang hrang vanga an tihtawp hnuah kum 2015 aṭang khan an din thar leh a ni. Vairengte aṭanga thu dawn danin, zu zawrh tihtawp a nih hlim khan Mizoram aṭangin heroin la turin Lailapur-a kal an pung a, chu'ng mite chu an hmuh fuh chuan Excise, Police, YMA leh MHIP-te'n home-ah an dah ṭhin. Tun hnaiah erawh heroin la tura Lailapur-a kal an tam tawh lo.