Leimin leh tuilian vangin harsatna a thleng

July ni 10 leh 11 chhung ruahsur vangin Mizoram hmun ṭhenkhatah chhiatna a thleng. Serchhipah leiminin in pakhat a hnâwl a, Khawthlangtuipui lian mekin chhungkaw eng emaw zatte tan harsatna a thlen mek. 

Nimin tlai dar 5 vel khan Phairuangkai khuaah Nawnawla (L) in chu leiminin a hnâwl. Leiminin in a hnâwlah hian pitar pahnih - Nawnawla nupui leh a laizawnnu an awm a, mahse, an na vak lo nia thu dawn a ni. June 10, Nilaini tlai khan Serchhip Chanmari Venga Zabiaka in, Assam type, chhungkaw pahnih luah lai chu a kawmchhak lama leiminin a hnâwl a, bungrua an chuh hman lo a, mihring thi leh hliam erawh an awm lo. Thu dawn danin, lei a min hmain tam vak loin a tla hmasa a, chuvang chuan mihring chu an insaseng hman a ni.

Lunglei district-a Bung­hmun khuaah Isua Krista Kohhran (IKK) biak-in bulah lei khi thar hmuh a ni a, lei khî huam chin a zau viau niin an sawi. Bung­hmun khua hi nikum fûr laia nasa taka lei khîk tawhna a ni a, chuvang chuan chhungkua 30 velin an chenna in an ruauhsan a ni. Khawthlangtuipui chu nimin lam khan a lian tawh hle a, tuipui kam hnaih zuala awm khaw ṭhenkhata chenna in leh leilet eng emaw zat a chîm tawh. Tlabung aṭanga thu dawn danin, Tlabung bikah chhungkaw pakua chu hmun him lamah an insawn tawh a, ruah a sur zel chuan in 40 velte dinhmun a him lo niin an sawi. Tippereghat khuaah pawh in 15 vel tuilianin a chîm tawh a ni.