MPC president Lalhmangaiha Sailo
Mizoram People Convention (MPC) party chuan nimin khan an pisaah General Assembly an hmang a, kum 2019-2021 chhunga an president atan Lalhmangaiha Sailo s/o Brig. T Sailo, Tuivamit an thlang.
MPC hian president ṭanglai Lalhmangaiha Sailo chu a nihna ngai chelh zui zel turin an thlang nawn a; vice president atan Lalthansanga (Chátea), Zarkawt leh treasurer atan V Lalṭhazuala, Dawrpui Vengthar-te an thlang. Inkhawmah hian resolution point pathum an siam nghal a ni.
Lalhmangaiha Sailo chuan, MPC party chuan innghahna nghet tak an nei tih sawiin, "Kan ram, kan hnam, kan sakhua a him theih nan dikna, rinawmna leh taimaknaa thawk tura kilh hnan tlat a nih avangin kan tam leh tlêm lam ni loin kan ding zel a ni," a ti.
MPC President chuan, an party dintu Brig. T Sailo-in hmathlir thui tak a neih avangin policy hlâwmkhawmna ‘Six Basic Needs’ an nei tih a sawi a, "Heng kan mamawh hmasa leh a bul hi hlamchhiahin kum 30 chuang lai Mizoram sorkar a kal avangin awmzia kan la nei thei lo a ni," a ti a; sorkarna chelhtute'n tlachawp policy-in Mizoram an kaihhruai a, hmasawnna tluantling a la awm thei lo tih a sawi.
Brig T Sailo hmalaknate sawiin Lalhmangaiha chuan, "Chakma foreigner, Cachar nena kan ramri leh hnam inchîmralna chungchangte buaipuiin, amah ngei kalin hma a la a, a hmalaknate hi hmathlir thui tak leh awmze neiin a bawhzui a ni," a ti. Ram hmasawnna atan kawlphetha a pawimawh avangin mutmawh hnàrmawhah neih a ngai tih sawiin, "Vawiin thlengin hlamchhiahin a awm. Inkalpawhna ṭha, ei leh bara intodelhna kawngah nasa taka hma lak a ṭul tak meuh a ni," a ti bawk.
MPC Assembly resolution
1. Mizoram state puitling kan nih kum 33 hnuah pawh ramri (boundary) chinfel loh te, power (kawlphetha)-a intodelh, tui thianghlim in tur tlachhama kan awm te, hmalak tak takna awm lote hi MPC chuan pawi a ti a, sorkarna fawng chelhtute kan dem tak meuh. Tun aṭang chuan Mizoram sorkar hi ṭhahnemngai taka thawk turin kan phût a ni.
2. NLUP leh SEDP hmanga sum sem hian harsatna nasa zawk min thlen niin kan hria. Chuvangin, ei leh bara intodelhna leh kut hnathawktute dinchhuahna ruahmanna ṭha nei turin sorkar kan phût tlat a ni.
3. Kan ram, kan hnam leh sakhua a him zel theih nan MPC party chuan theihtawp kan chhuah zel ang.