Home Minister-in Mamit a tlawh Ruihhlo laka fihlim turin Police-te a fuih

Home minister Lalchamliana chuan July 10, Nilaini khan Mamit a tlawh a; Luangpawla 4th. IR batta­lion headquarters, SP office, DC office, Fire & Emergency Service office leh police station-te dinhmun a enfiah. RPolice-te chu zu leh ruihhlo dang laka an fihlim a pawimawh thu sawiin discipline leh physical fitness-te ngai pawimawh thar a, thawhhona ṭha tak nena hma lam pan zel turin a chah.

Minister Lalchamliana hian 4th IR. Bn. Hqrs. hmuhpui a tlawh a, an nupui fanau, chhungkua kalsana ram leh hnam venghim tura border out post (BOP) pasarih hmunhmate tlawh chhuah hrim hrim chu Mamit a tlawh chhan pakhat a nih thu a sawi. "4th. IR Bn. indaih lohna ka hriatpui a, police indaih lohna tiziaawm turin armed, un-armed leh a dangte mi 700 lak belh tura ruahmanna siam a ni a, sorkar kum kal mekah hian Finance department lamin min phalsak kan beisei," a ti.

Mamit DC pisa-ah Home Mi­nister hi bawrhsap Dr Lalrozama'n a lo dawngsawng a; aspirational district an nih avangin harsatna an ngah bik thu a lo hrilh. Home Minister hi bialtu MLA Lalzirliana, Taxation commissioner & secretary Vanlalchhuanga, DIG (Northern Range) Lalbiakthanga Khiangte leh official dangte'n an ṭawiawm a ni.