Health Minister-in Aizawl Civil Hospital a tlawh
Health & Family Welfare minister Dr R Lalthangliana chuan nimin zing dar 7 khan Aizawl Civil Hospital a tlawh a, damdawi-ina department hrang hrang awmna hmun, hmanrua leh khâwl chi hrang hrangte a en bakah, thawktute nen damdawi-in tihchangtlunna atana pawimawhte an sawiho.
Health Minister chuan, Aizawl Civil Hospital (ACH) chu kum 1894-a din a nih thu sawiin, "Ram leh hnam rohlu a tling pha a, chu vang chuan hlamchhiah theih a ni lo a, tihchangtlun dan tur ngaihtuah a ngai," a ti a; tihchangtlun dan tur ngaihtuahtu tur committee din a ṭul thu a sawi.
ACH-a thawktu doctor leh nurse-te'n damdawi-in bul hnaia chenna tur residential quarters an nei lo chu pawi a tih thu sawiin Dr R Lalthangliana chuan, "Damlo emergency-a buaipui ngai an awmin hei hian harsatna lian tak a thlen ṭhin a ni," a ti.
Post graduate (Diplomate of National Board) zirlaite hostel building a tlawhnaah Minister chuan, a rang thei ang bera thawm ṭhat dan ngaihtuah a nih tur thu a sawi a, "Doctor kan ngah rualin, department ṭhenkhat pawimawh tak tak vil tur specialist doctor kan nei lo ṭhin hian rualawh a tiná a ni," a ti a; ram pawn lama zirna sang zawk pan tura intirh chhuah tam a ngaih thu leh doctor-te pawh ngaihven tura a duh thu a sawi.
Health Minister chuan, thawktu indaih lohna chungchangah, indaih lohna nasa zual - nurse, technician leh grade-IV te a rang thei ang bera chin fel a nih tur thu a sawi a, "Staff indaih lohna vanga Geriatric Ward (tar/upate enkawlna) hawn theih a la ni lo hi tih dan kawng dap a ni ang," a ti.
Dr R Lalthangliana hian Cardiology ward a tlawhnaah Cardiac Catheterization Laboratory (Cath.Lab) earthing siamṭhat a ngaih vanga kháwl hman theih loha awm chu siamṭhatsak turin amah ṭawiawmtu Power & Electricity engineer-te a hrilh a; Oxygen Plant ventilation siam belh ngai pawh a rang lama siamsak turin PWD engineer-te a chah.
ACH-ah hian khum 275 a awm mek a, clinical department 15, super speciality department pakhat, para-clinical department pali leh support service hrang hrangte a awm a; post graduate (DBN) zirna subject panga awmin, zirlai 27 (mipa 19 leh hmeichhia pariat)-in an zir mek. DBN zirna hi Medical Council of India leh Indian Nursing Council-te pawmpui a ni.
Health Minister hi Health & Family Welfare Board vice chairman Dr ZR Thiamsanga, Health secretary H Lalengmawia, Principal Director leh Director te, PWD leh P&E engineer-te'n an ṭawiawm.