'Kan Sikul, Kan Huan' kalpui dan tur sawiho

Lawngtlai DC Sha­shanka Ala hmalak­naa Lawngtlai district-a project kalpui tur 'Kan Sikul, Kan Huan' (Project Nutrition Garden) Phase-I atana thlan sikul, anganwadi centre leh naupang enkawlna hmuna zirtirtu leh thawktute tan July 10, Nilaini khan district chhunga RD block hrang hrangah hmalak dan tur inzirtirna buatsaih a ni.

'Kan Sikul, Kan Huan' project-in a tum ber chu, bazara mi lei ngai loa sikul, anganwadi centre leh naupang enkawlna hmunte’n an mamawh thlai hrisel leh thianghlim an thar chhuah a, an intodelh theih nan a ni a; chutiang tur chuan sikul leh anganwadi bula huanah thlai chìntir tum a ni.

Project bul ṭanna atan Lawngtlai district-a primary school 38, middle school 78, high school 35, anganwadi centre 59, child care institute pathum leh SSA residential hostel pakhat, a vaiin zirna-in 214 thlan a ni a; DC kaihhruaina hnuaiah School Education, Social Welfare, Rural Development, Soil, Agriculture, Horticulture, KVK leh sikul zirtirtute leh naupangte thawhhonain huan siam a ni ang.

Phase-I hnuaiah hian zirna-in thlan chhuahte'n an sikul bulah square ft. 100 vela zau thlai hmun an siam ang a, chu chu Work Education hnuaiah zirtirtute leh zirlai naupangte'n an enkawl dawn a ni. A ṭul angin leilung sâwngbâwl chungchangah Soil department mi thiamte’n an pui dawn a, Horticulture department-in thlai chi an tum ang a, thlai chìn dan leh enkawl danah Agriculture department leh KVK mithiamte'n an pui dawn a ni.

Project bul ṭanna atan hian thlai chi nga - anṭam, bean, behlâwi, bawrhsaiabê leh tomato thlan a ni a; a chi pawh khaw hrang hrangah an thawn tawh a ni.