Tuilian vangin chhungkua 320 chuangin An chenna in an chhuahsan

Mizoramah ni thum chhung ruah a sûr tawh. Hmun hrang hrangah tuilianin zual lam a pan mek. Khawthlang lam leh chhim lamah chhungkaw 320 chuangin an chenna in an chhuahsan tawh a, mihring thi leh hliam erawh an awm thu hriat a ni lo.

Tlabung Post editor Vanlal­hriatpuia Khiangte hnen aṭanga thu dawn danin, Mizoram khawthlang lama Khawthlangtuipui chu nasa takin a lian mek a, nimin thleng khan Tlabung khuaah chuan chhungkaw 110 velin an chenna in an chhuahsan tawh a, Serhuan khuaah pawh chhungkaw 119 leh Tippereghat khuaah chhungkaw 90 chuangin an chenna in an chhuahsan tawh bawk. Nunsury-I khuaah chhungkaw panga leh Silkur khuaah chhungkaw pasarihte'n an in an rauhsan mek a ni.

Tuilian vanga an in chhuah­santute hi sorkar enkawl Trade Facilitation Centre te, zirna in te, MSU office te, bazar building leh mimal inahte an invawm lut a; chhungkaw tam tak chu hmun remchangah hulhliap zarin an awm lailâwk rih bawk.

Tlabung SDO(C) thar Henry C Lalrawnkima chuan July 11, Ningani tlai khan a hna thar zawm turin Tlabung a thleng a, Tlabung a thlen veleh tuilian vanga chhiatna thlenna hmunah kal nghalin, mahni in chhuahsantute awmna a tlawh. Tlabunga YMA hruaitute nen chhawmdawl hna thawh dan tur an sawiho a, a ṭula hman turin silpauline eng emaw zat a pe nghal a ni.

Tlabungah hian hmun pa­thumah lei a min a, Tlabung Chawnpui Vengah leiminin chenna in pakhat a hnâwl a, mihring thi leh hliam an awm lo. Leiminna bula in dang pahnihte pawh a him loh avangin a luahtute'n an chhuahsan a ni. Tlabung leh Lunglei inkar kawngpui pawh leiminin nimin khan a hnawh ping a, thing kung tlu leh thing zár tliakin electric hrui hmun tam takah a vaw chhe bawk.

Ngengpui lui pawh nasa takin a lian a, Ningani aṭang khan Ngengpuikai khua in tam tak a chîm ṭan a, nimin lamah pawh tui a len belh zel a ni. Tuilianin in a chím zel avang hian chhungkaw ṭhahnem tak chuan an in an chhuahsan rih a ni.

Mamit district-a Darlung khuaah pawh lei a khîk avangin nimin khan Lalchhuanawma in chu khawtlangin an ṭhiat. Kânghmun khuaah Lalruatmawia in, Assam type chu a dinna lei a min avangin a ban a inkhai a, luah zui ngam a nih loh avangin an inthiar chhuak a, nimin khan khawtlangin an ṭhiat nghal.

Thakthing Veng, Aizawla A Rodingliana (L) in, assam type pawh a dinna lei a chêt avangin luah ngam lohin a awm a, a bul chiaha A Rodingliana (L) in tho RCC building tan pawh a him loh avangin a luahtute'n an riah chhuahsan mek. Lei chê hi Disaster Management & Rehabilitation lamin an enfiah tawh. Lunglei Zotlanga Tourist Lodge panna kawng pawh kum danga a lo khîk tawhnaah a khîk belh a ni.

Mizoram hmun dangah pawh leimin a awm nuala thu dawn a ni a, chhiatna lian tham a thlen erawh hriat a ni lo.