Ramri chingfel loin remna ziah a ni - Lal Thanhawla
Mizoram Pradesh Congress Committee (MPCC) chuan nimin khan Congress Bhavan-ah Mizoram ramri zirhona an buatsaih. MPCC president Lal Thanhawla chuan, ramri chingfel hmasa loin inremna (Memorandum of Settlement) ziah a nih thu a sawi.
Lal Thanhawla chuan, MNF leh India sorkarin inremna an ziah dawnin, 'Rami chungchang chinfelna hun remchang a ni e' tia ramri chingfel hmasa phawt turin MNF hotute an ngen a, mahse, ngaih pawimawh a hlawh lo tih a sawi a,
"Remna ziah an hmanhmawh em avangin ramri chingfel hmasa loin remna ziah a ni ta a, a pawi zo ta a ni," a ti.
Ramri zirhonaa tarlan a nih danin, Mizoram leh Assam ramri buai chungchangah Congress kaihhruai sorkarin nasa takin hma a la tawh ṭhin a, kum 1993-a an sorkar laiin DC level-ah inbiakna neih a ni a, chief secretary level-a inbiakna neih zui a nih hnuah, chief minister level-a inbiakna awm leh tura ruahman a ni.
Chief minister level-a inbiakna awm leh tura ruahman a nih ṭum hian chutih laia chief minister Lal Thanhawla’n Delhi-ah inbiak a rawt a, Assam CM Hiteswar Saikia chuan Guwahati-a inbiak a rawt ve thung a, an thu a inhmu ta lo a ni. Chumi hnuah chuan ramri chingfel tura high level-a inbiakna mumal a awm tawh lo.
Mizoram chief minister hmasa ber Ch. Chhunga’n January 2, 1974-a Prime Minister hnena memorandum a thehluha a tarlan, 'Lushai territory leh Cachar inkara ramri demarcated leh notified awmchhun chu Inner Line Reserved 1875 hi a ni a, chuvang chuan, Inner Line Reserved Forest (ILRF) area hi Mizoram chhungah a awm vek tur a ni,' tih chu Mizoram leh Assam inrina atana Mizoram lamin an pawm tlân a ni.
July 3, 1987-a Dispur, Assam-a state pahnih chief secretary-te inbiaknaah pawh ILRF 1875 chu Mizoram ṭan chhan a ni a, Mizoram sorkar Cabinet meeting May 27, 1988-ah pawh chu tho chu an ṭan chhan a ni. Cachar leh Mizoram inrina chu Inner Line Regulation, August 1875-ah chiang taka tarlan a ni a, chhinchhiahna ramri lung pawh 46 phun a ni. Chu chu Assam Government Note on the Lushai, 1973-1889 ? paragraph 86-ah tarlan a ni.
Chutiang a nih lai chuan, India sorkar leh MNF inremna, Memorandum of Settlement Article 4.3(1)-ah chuan, North Eastern Areas (Reorganisation) Act, 1971 chu Mizoram leh Assam leh Mizoram ramri a nih thu tarlan a ni a; chu chuan tun thlengin Mizoram ṭanhmun a tiphet ta niin MPCC chuan an tarlang.