NEET 2019 counselling ṭan theih a la ni lo JEE leh SMATEE counselling tih a ni tawh

National Eligibility cum Entrance Test (NEET) 2019-a tling Mizoram quota-a medical course zir tur thlanna counselling chu tih ṭan a la ni lo a, tih ṭan hun tur sawi theih a la ni lo zel. Hetih lai hian, Joint Entrance Examination (JEE) counselling chu zawh a ni tawh a, State Medical and Technical Entrance Examination (SMATEE) counselling kalpui mek zel a ni.

Vanglaini palai zawhna chhanga Higher & Technical Education (HTE) Technical Wing hotute sawi danin, The Mizoram (Selection of Candidates for Higher Technical Courses) Rules, 2016 chungchangah Mizoram Council of Ministers meeting-in thutlukna a siam tâk avangin NEET counselling chu tih mai theih tawhah ngaih a ni a; mahse, counselling tih hun tur tak erawh chu an sawi thei rih lo.

HTE Technical Wing hotute chuan, SMATEE counselling an zo thawkhat tawh tih sawiin, "Zirlaite hnenah allotment kan pe mai tawh dawn a ni," an ti a; NEET counselling chu SMATEE tihfel zawhah, zirlaite admission tlai lo tur sia tih an tum thu leh, a hun tur tak sawi mai theih a nih loh thu an sawi. 

HTE department hian July 9, 2019 aṭang khan Joint Entrance Examination (JEE)-a tlingte tan chuan counselling an buatsaih tawh bawk. Tarlan tawh angin, Gauhati High Court, Aizawl Bench-in The Mizoram (Selection of Candidates for Higher Technical Courses) Rules, 2016-ah Chakma-te chu category-I ah awm ve turin thutlukna a siam a; High Court thutlukna chu Mizoram sorkarin Supreme Court-ah an khing a, Supreme Court chuan thutlukna a la siam lo.

Chutih laiin, June 8, 2019-a Council of Ministers meeting-in The Mizoram (Selection of Candidates for Higher Technical Courses) Rules, 2016-a Category-I a dil theite 'Indigenous People' tiha inziak chu 'Zo Ethnic' bak Mizoramah 'Indigenous people' an awm loh avangin, 'Zo Ethnic' te pual atan dah turin thutlukna an siam. Supreme Court-in thutlukna la siam lo mah se, Cabinet thutlukna avang hian NEET-a tlingte chu counselling neihpui theihah ngaih a ni.

Mizoramin Central pool hnuaiah MBBS leh BDS seat a hmu leh dawn em tih hriat chian a ni lo a, a hmuh dawn pawhin, a hmuh zat tur hriat theih a ni rih lo. Mizoramin MBBS seat a neih zat hriat tawh chin chu seat 84 a nei a, seat 84 zinga 70 chu Zoram Medical College (ZMC) / MIMER-ah a ni a, a bak chu North Eastern Council hnuaia hmuh a ni. NEC-ah hian BDS-ah seat pasarih hmuh a ni bawk.

Kumina NEET result chhuakah Mizoram aṭangin qualifying mark hmu pha mi 595 zinga pakhatna chu Lalruatpuia Sailo a ni a, ani hi India ram pumah (all India ranking)-ah 94,200-na leh schedule tribe bikah 1,051-na a ni. Mizoram top 10-ah Chakma pakhat leh hnam dang (vai) pakhat an lang tel. Kum 2018 NEET-ah khan Mizoram aṭanga pakhatna chu Sujan Chakma a ni a, top 10-ah Chakma zirlai pathum an lang a ni.