Assam Forest-te an la chhuak lo Kan dinna ngaiah kan ding - MZP

Nimin, July 12 kha MZP-te'n Vairengte leh Lailapur inkara sipai cinema hlui ina Assam Forest mi leh sa awmte chhuahtir tura Mizoram sorkar an ngen hun tàwp ní a ni a, he thu ziah lai thleng hi chuan an la chhuak lo. MZP president L Ramdinliana Renthlei chuan, Mizoram sorkar an phûtnaah an dinna ngaia an la din reng thu a sawi.

Vairengte police aṭanga thu dawn danin, Assam Forest mi leh sate chu tun hnaia in an thawm ṭhat takah an la awm reng a, anmahni veng ṭhintu CRPF sipaite erawh chu an inhnûkdâwk tawh. Assam Forest mi leh sa pakhat leh forest guard pakhat (silai kengte) chu sipai camp hlui bulah ni tin an kal ṭhin thung. Sipai camp hluiah hian tui connection leh electric connection a awm lo a, a awm theih nan hma an la rih lo nia hriat a ni.

Nimin tlaia Vanglaini palai zawhna chhangin MZP President chuan, MZP chu an dinna ngaiah an la din reng thu a sawi a, "Ngenna kan thlen chungchangah Mizoram sorkar aṭangin chhanna kan la dawng lo. Kan ngennate tihhlawhtlin a nih loh chuan kan lo tum lâwk tawh angin, July 19, 2019-ah 'Ram chhan kawngzawh' kan huaihawt ang," a ti.

Tarlan tawh angin, MZP chuan July 10, 2019 khan Home Minister hnenah lehkha thawnin, July 12, 2019 hmaa sipai cinema hall hluia Assam Forest mi leh sate chhuahtir turin an ngen a, an chhuahtir lo a nih chuan July 17, 2019 ral hmain Bairabi Zophaiah Zofate Chawlhbuk sa turin an phût. An thil phûtte hi tihhlawhhtlin a nih loh chuan MZP chuan 'Ram chhan kawng zawh' an huaihawt tur thu Home Minister an lo hrilh tawh a ni.

Hetih lai hian, Vairengte police chekgate aṭanga metre 100 vel hla, pioneer camp hluia Mizoram IR platoon khat awm mekte chu Vairengte khawtlangin a ṭul ang angin an pui chhunzawm zel a ni.