Mizoramin Best Horticulture Award a dawng

Mizoram chu Best Horticulture State Award 2019 hlan a ni a, nimin khan Union Agriculture & Farmers Welfare minister Narendra Singh Tomar-a'n Hotel Taj Palace, New Delhi-a 9th Agriculture Leadership Awards 2019 semna inkhawmah semin, Mizoram aiawhin Horticulture depart-ment director Elizabeth Saipari'n a dawng.

Award hi mimal hna thawk ṭha bik pariat te, state sorkar pali leh corporate pariatte hnenah loneitute khaichhuahna leh an hmasawnna kawnga hna thawh ṭhat vangin hlan a ni a; award buatsaihtu chu Agriculture Today a ni.

Mizoram Horticulture department tarlan danin, Best Horticulture State Award hi thei leh thlai chíngtute tana hna thawh hlâwk leh hmalak ṭhat vangin Mizoram Horticulture department hnenah hlan a ni.

Horticulture hmalak-nain India rama la awm ngai lo dragon fruit chu Mizoramah uar taka chìn ṭan a ni a, a chíngtute'n a hlâwkna an hmu ṭan niin an tarlang. Department hmalaknain pangpar chi hrang hrang chîn uar a ni a, off-season laiin fûr zikhlûm leh tomato thar chhuah aṭangin kut hnathawktute'n hlâwkna an tél mek niin an tarlang bawk.

Horticulture depart-ment hian thlai phun tur ṭha (quality planting material) an neih theih nan Haulawng ramah Centre of Excellence an din tawh a; Centrally Sposored Scheme (CSS) hnuaiah greenhouse sak te, tuikhuah siam te, farm mechanisation-te leh thlai leh thei thar chhuah sa vawnhim nan cold chain system ṭha taka siam a nih thu an tarlang a ni.