KHAWTHLIR

PHE department thuchhuahin a tarlan danin Aizawl tui tlan Tlawng lui tui chu thlitfim theih loh khawpa a nut avangin tui a pump mumal theih loh a, hun eng emaw chen tui sem a khaihlak phah theih dawn avangin renchem taka tui hmang tur leh ruahtui khâwl turin mipuite an ngen a ni.

Zirtiri Residential Science College (ZRSC) chuan nimin khan Vanapa Hall-ah zirlai lut tharte lawmna leh zirlai chhuak turte thlahna an buatsaih a, Higher & Technical Education minister Dr R Lalthangliana'n a hmanpui. HTE Minister chuan, "Kan rama hna ruak leh mawhphurhna tam tak state páwn lam mite'n min thawhsak zel loh nan subject thlan danahte thlengin thil kan chîk peih a ngai," a ti. Zirtiri RSC-ah hian zirlai 600 chuang an awm mek a ni.

Aizawla ni tin chanchinbu Zoram Tlangau joint editor Richard Lal­lawm­zuala (48) s/o Lalbiakthanga Pachuau, Chanmari chu July 11, Ningani zan dar 8:15 khan Septicemia natna vangin a thi a, nimin khan vui a ni.

Serchhip District Immunization Task Force Committee chu nimin khan an chairman Sangchhin Chinzah, district bawrhsap hoin an ṭhukhawm a, naupang kawṭhalo laka invenna tur, Rota Virus vaccine pek dan tur an sawiho. Rota Virus hi India ram state 11-ah pek a ni tawh a, Serchhip district-ah pawh nausén hri danna pek ṭhin hun pangngai, August thla aṭangin pek ṭan tur a ni.