Zirna hmangin Mizoram chhan a ngai - Lalchhandama Ralte

School Education minister Lalchhandama Ralte chuan, zirna hmangin Mizoram chhan a ngaih thu a sawi a; Mizo zirlaite chu tunlai inelna sang taka fit (tling) tak nih tum turin a chah.

Minister Lalchhandama Ralte hian MZP Sub-Hqrs., Hnahthialin zirlai ti ṭhate chawimawina nimina Hnahthial Electric Veng community hall-a an buatsaihah thu sawiin, "Kan ram, kan hnam leh kan sakhua a dam theih nan zirnain dinhmun sang tak a luah a ngai a, zirnaah Zofate hi top class-ah zel awm tum ila, chumi hmang chuan kan hnam hi kan chhan a ngai a ni," a ti.

Mizo zirlaite chu tei rei peih, tuar peih ni tur leh tunlai inelnaah fit tak nih tum tura chahin Lalchhandama Ralte chuan, "All India service-ahte pawh tling thei ngei tura ṭan la turin ka sáwm che u a, district tina a post pawimawh Mizoin kan luah theih nan zirlaite'n theihtawp in chhuah a ngai," a ti a; Mizoram mamawh chhanna nih tum turin zirlaite a fuih.

School Education Minister chuan, khawtlang hruaitute leh nu leh pate pawh zirna chung­changah rilru siam thar pu tur leh zirna ngai pawimawh turin a chah a; "Sorkarin zirna hmunhma a neihte hi thil dang atan ît mai lo a, humhalhpui tlattu kan nih a ngai. Zirtirtute pawh an service-te zirlaite tan tih tak zeta hlan turin ka sáwm a, naupangte'n an pan leh an bawm ni tur khawpa ṭan kan lak a ngai a ni," a ti.