Minister-in PACS a hawng

Kolasib Multipurpose Coopeartive Society (KMCS)-te hmalakna pakhat, Primary Agriculture Credit Society (PACS) chu nimin khan Kolasib DAO conference hall-ah minister K Lalrinliana'n a hawng.

K Lalrinliana chuan, society kalphunga rahbi pawimawh tak pakhat, PACS hawng thei din­hmuna KMCS a awm chu thil chhinchhiah tlak leh hmasawnna rahbi a nih thu a sawi a, "Society hi kum 1989 vel aṭang tawh khan ka hmelhriat tawh. Society hlawhtling ni tur chuan rinawmna leh teirei peih a pawimawh ber," a ti.

Mizote chu inláwm ṭhin leh a huhoa thil ti ṭhin hnam an nih thu sawiin K Lalrinliana chuan, "Chu chu society kalphung nen pawh hian a inrem hle. Society kaltlang hian khaw­tlang bakah, ram tana thil hlu tak takte deh chhuah a ni fo tawh," a ti a; Mizoramah pawh awmze nei leh taima taka society kalpui a nih chuan ram hmasawnna atan rahbi pawimawh tak a tlin theih thu a sawi.

Kolasib district-ah hian PACS kalpui pahnih an awm a, Village Farming Society leh KMCS an ni. Mizoram Apex Bank hnuaiah hian PACS kalpui society 26 awm mekin, deposit-ah cheng nuai 1400 chuang an la lut tawh a, loan atan cheng nuai 1200 chuang an pek chhuah tawh a ni.

KMCS hi April 2018-a register a ni a, Project Veng­ah variety store an nei. Thla ruk chhunga an variety store-a turnover chu Rs. 18,00,000 chuang a tling.