Project base-in SEDP kalpui a ni dawn - Minister Dr K Beichhua

Sericulture minister Dr K Beichhua chuan July 11, Ningani khan South Sabual khuaa silk pangang khawina, Muga Rearing Farm a tlawh a; thu sawiin, Socio Economic Development Programme (SEDP) chu project base-a kalpui a nih tur thu a sawi.

Sericulture department Common Facili­ty Centre-a khawtlang hruaitute nen an inkawmnaah Dr K Beichhua chuan, SEDP kalpuina atan board 14 din a nih tawh thu sawiin, "SEDP hi project base-a kalpui tur a ni a, a hlawhtlinna chu mipuite chungah a innghat," a ti a; hmasawnna hna thawhnaah mipui ṭawiawmna ngen.

Sericulture Minister chuan, Sericulture department hmanga ram leilung hausakna hâi chhuah nachang hriat loh a hlauhawm thu sawiin, "Muga silk pangang enkawlna atana India ramah Mizoram boruak aia ṭha a awm lo," a ti.

Dr K Beichhua chuan, MNF sorkar chu Pathianin hma lam panin a hruai zel tih sawiin, "Ei leh bâra kan ram intodelh hi sorkar thil tum a ni," a ti a; Mizoram a intodelh loh chuan mi dangte tan malsawmna a nih theih loh tih sorkarin a hmuh chian thu a sawi. 

Sericulture Minister hi Bamboo Development Board vice chairman Dr K Pachhunga, MLA leh department official-te'n an ṭawiawm a ni.