Ka sorkarin a mipui tana chak taka Hna thawk turin ṭan a la reng - Governor

Nimin khan March 17 thleng awh tur Mizoram Legislative Assembly pariatna session vawi sarihna ṭan a ni a, governor PS Sreedharan Pillai chuan Mizoram sorkar chu a mipuite tana chak taka hmasawnna hna thawk turin ṭan a la reng tih a sawi.

PS Sreedharan Pillai hian Mizoram sorkar policy-te leh a bawhzui dan te, a hnathawhte leh hmachhawpte a tarlang a, "Ka sorkar chuan state mipui mamawh phuhru tur leh chak taka hmasawnna hna thawk turin a inpeih a, ṭan a la reng a. Mizoram mipuite ka ring tawk a, sorkar ṭha takin an thawhpui ṭhin. Mipui thawhpuina azarah hmasawnna nei a, nun nuam zawk nei turin kan hmaa tih tur awmte kan hlen ngei ka beisei," a ti. 

Sorkar laipuia Planning Commission tihtawp a nih hnuah state sorkarte'n an state hmasawnna turin mawhphurhna lian zawk an nei tih sawiin Larsap chuan, Mizoram sorkar pawhin sorkar laipui aṭanga sum (Central devolution of taxes) hâi luh a nih theih nan ṭan a lâk a ngaih thu a sawi. 

Governor sawi danin, kum 2020-21 chhunga SEDP kalpuina atan cheng vbc. 148 dah a ni a, mahse, Covid-19 hripui léng avanga sorkar laipuiin budget 15%-a a tihhniamin SEDP a nghawng a; SEDP atana sum dah pawh 15%-a tihhniam a nih avangin kum 2020-21 chhunga SEDP kalpuina atan vbc. 82.45 chiah ruahman a ni. 

North Eastern Council (NEC) hnuaia scheme-te chu sorkar laipuiin a tum vek tur a ni tawh a, chutih rualin, project kal mektea funding pattern chu 90:10 a ni zui zel ang. NEC hnuaia hmalaknaah Mizoram chu hmarchhak state dangte nena khaikhinin a ti ṭha berte zinga mi a ni a, kum 2020-21 chhungin project hrang hrangah cheng vbc. 83.37 hmuh niin, project kal mek 16 a awm. 

Governor chuan nikuma Thinghlun rama Assam mite'n Mizo thlám an hâl leh a hnua state ramria buaina chhuak chungchang te, ramri kâna sorkar phal loh thil tawlhrûk chungchangte a sawi chhuak a, "Ka sorkar chuan dan leh thupek kenkawh kawngah te, ram leh mipui venhim kawngahte theihtawp a chhuah a ni," a ti a; Covid-19 hripui léng kaih­hnawihah state leh inter­national boundary chhehvelah Mizoram police 3,000 dah a nih thu a sawi.

PS Sreedharan Pillai chuan, ei leh bara intodelhna state sorkar hmalakna hrang hrang te, inkalpawhna kawngpui, hriselna, zirna, kawlphetha, tui leh kawng hrang hranga sorkar hmalaknate a sawi lang a, "Ka sorkar chuan mipui hriselna leh thingtlang mipuite hriselna hi ngaih pawimawh ber pakhatah a nei a, hripui léngah pawh chak taka hmalak a ni a, Mizoram chu Covid-19 vei tlemna ber leh hripui vanga thi tlemna ber a ni thei a ni," a ti.

Governor hian session chu tluang taka neih a beisei thu sawiin, Mizoram state Legislative Assembly pariatnaa member-te chu mipui tana rorel turin duhsakna a hlàn a ni.

Larsap thusawi avanga lawmthu sawina, motion of thanks chu MNF member C Lalmuanpuia'n a pulut a, vawiinah sawiho a ni ang.