COVID-19: Mizoram dinhmun Hripui vei mi 1 hmuh belh a ni
February 22, Thawhṭanni khan Mizoramah Covid-19 vei mi pakhat hmuh chhuah a ni a, tualchhunga kái a ni. Nimin khan hripui laka fihlim tawh chhuahtir an awm lo.
Covid-19 vei Thawhṭannia hmuh thar chu RAT hmanga hmuh chhuah niin, Chhinga Venga hmeichhia kum 41 mi a ni a, private hospital pakhata inentir tura a kalnaah hripui a vei tih hmuh chhuah niin, a kàina hriat a ni lo a, symptom nei lo a ni. ZMC laboratory leh TrueNAT-PCR hmanga swab sample endik zingah Covid-19 vei hmuh a ni lo.
Mizoramah Covid-19 vei mi 4,410 hmuh chhuah a ni tawh a, mipa 3,222 leh hmeichhia 1,188 an ni. Nimin tlai dar 5 thleng khan mi 4,379 (99.30%) chhuahtir an ni tawh a, mi 10 (0.23%) thi tawhin, enkawl mek mi 21 (0.47%) an awm.
Thawhlehni khan ZMC laboratory-ah swab sample 45, TrueNAT-PCR hmangin district pathumah sample 14 leh RAT hmangin district pakuaah sample 910 endik a ni a; sample endik zawng zawng chu 969 niin, chu'ng aṭanga Covid-19 positive hmuh chhuah pakhat chu 0.10% a ni.
February 22, 2021 thlenga Mizorama swab sample endik tawh zat chu 2,27,598 a ni a, chu'ng aṭanga Covid-19 positive mi 4,410 chu 1.94% a ni. Hripui vei hmuh tawh zinga mi 2,098 chu Mizoram chhunga kái an ni a, mi 2,312 chu Mizoram páwn aṭanga an rawn luh hnua hmuh chhuah an ni thung.
Mizorama district 11 zinga district paruk - Siaha, Kolasib, Serchhip, Mamit, Khawzawl leh Hnahthial district-ahte Covid-19 vei an awm tawh rih lo.