KHAWTHLIR

State NSS Cell huaihawtin nimin khan Aizawla zirna-in ṭhenkhata NSS volunteer-te'n Aizawl Civil Hospital blood bank-ah thisen unit 32 an pe a, petute mipa leh hmeichhia 16 ve ve an ni. Thisen petute chu Hindi Training College aṭangin mi 22, Zirtiri Residential Science College aṭangin pariat leh Govt. Aizawl College aṭangin pahnih an ni.

Excise & Narcotics department hnuaia Anti-Narcotics Squad leh 46th Assam Rifles-te chuan nimin chhun dar 11:50 khan Bawngkawn Shalom Vengah heroin gram 128 (hawng 10) leh a neitua puh mi pahnih - Lalkima (25) s/o Thawnkapa, Hrianghmun Vengthar, Champhai Vengthar Tlangnuama khawsa mek nia inchhál leh Mangkhanpauva (38) s/o Liandokhena, Ngur, Champhai Vengthara khawsa mek nia inchhál­te an man nghal bawk. 

Nimina ṭan tâk Assembly budget session chhunga Speaker leh Deputy Speaker an awm loha session kaihruaitu tur, Panel of Chairman atan Lawmawma Tochhawng (MNF), H Biakzauva (MNF), Nihar Kanti Chakma (INC) leh Dr Vanlalthlana (ZPM)-te ruat an ni.

Mizoram Veterinary Service Association chuan nimin khan pension-a chhuak tur AH&Vety director Dr Hmarkunga thlahna hun Vety Rest House-ah an hmang. An hun hmanpuitu AH&Vety minister Dr K Beichhua chuan, pension-a chhuah dawnah project siam a pawimawh thu sawiin, "Pension-a chhuak tawhte pawhin 'He department hi ka ta a ni, a chhiat a ṭhatah ka mawhphurhna a ni' tih rilru pu zui zel se ka duh," a ti.

State Referral Hospital-ah nimin khan Covid-19 vei mi pakhat dah luh belh a ni a, ani nen mi pariat enkawl mek a ni. SRH-ZMC Bulletin tarlan danin, mi pariat zinga pakhat chu ICU-ah ventilator hmanga enkawl mek a ni a, mi dang zawng Isolation ward-ah awmin, harsatna lian tham an nei lo. 

Aizawl Traffic SP Rodingliana Chawngthu chuan nimin khan thuchhuah siamin, vawiin aṭanga March 25, 2021 thleng Chawnpui LC-in Chawnpui PS bul aṭanga VL Ngena in (Chawnpui PS thlang) thleng kawng an siam dawn avangin, kawng siam chhungin lirthei tlân phal a nih loh thu a tarlang. Hnathawh tibuai theia kawngpui sîrah lirthei leh bungrua dah phal a nih loh thu a tarlang bawk.

Mamit SP Shashank Jaiswal chuan nimin khan hriattirna chhuahin, Bairabi-Zamuang kawnga Teirei lei (bailey bridge) chu lirthei zawh khap a hnih thu a puang. Hriattirna thupeka tarlan danin, naktuk aṭanga March 18, 2021 thleng Teirei lei hi metric ton 20 dâwl zo tura siam a nih dawn avangin, siam a nih chhungin lirthei zawh phal a ni lo.

Khawzawl district Monitoring Committee on Formation and Promotion of 10,000 Farmer Producer Organizations chu nimin khan an chairman Zothanmawia, bawrhsap hoin DC conference hall-ah an ṭhu a; ‘One District One Crop’ hnuaiah Khawzawl district-ah lakhuihthei chíng tura hmalak ni se, an ti.

Nimin khan Lunglei bawrhsap V Lalsangliana hoin DC conference hall-ah sorkar hotute an ṭhu a, Governor PS Sreedharan Pillai-a'n March 10, 2021-a Lunglei a tlawh huna dawnsawn dan tur an rél. Larsap hian Lunglei Circuit House-ah Lunglei district-a sorkar department hotute leh tlawmngai pawl, kohhran hruaitute leh political party-te a kâwm dawn a, Chhûmliam kâwna Bethel Centre leh Christian Hospital-te a tlawh 

bawk ang.