Agreement anga kawng siam theih nan CYMA-in hmalak chhunzawm zel a tum
Central YMA president Vanlalruata chuan, Mizorama kawngpui siamte chu CYMA leh PWD-in inremna (agreement) an ziah anga siam a nih ngei theih nan YMA-in hma an lâk zui zel dawn thu a sawi.
Vanglaini palai zawhna chhángin CYMA President chuan, report an dawn bawhzuiin kawng siam mekte an endik thu a sawi a, "Kan report dawn ang ngeiin kan kawng enfiahte an siam chhe hlawm. Kan thil hmuh chhuahte chu sorkarah kan thlen tawh a, an hmalak zel dan kan ngaichâng. Kan hmalaknain rah ṭha a chhuah leh chhuah loh pawh kan la hre chiah lo," a ti.
Vanlalruata chuan, kawng siam hna vil chu an chawlhsan mai dawn lo tih sawiin, "Tunah chuan hmun hrang hrang aṭangin kawng siam mek enfiah tura sàwmna kan dawn belh zel a, a ṭul angin enfiah hna kan thawk zel dawn," a ti a; YMA group leh sub-headquarter hrang hrangte pawhin kawng endik hna an thawh thu a sawi.
CYMA President chuan, Mizorama kawng siamte a nih dan ang tur taka siam chu an duh ber a nih thu sawiin, "Kawng siam ṭha lo leh tlo lo lutuk ṭhin hi keini chuan ṭha kan ti lo. Theihtawp kan chhuah chhunzawm zel dawn," a ti.
Hmun hrang hranga kawng siam hna thawh an endik hnu February 4, 2021 khan Central YMA hruaitute chuan thuthar thehdarhtute kâwmin, Mizorama inkalpawhna kawngpui siama hna thawh mekah a huna thawh zawh loh, contractor hminga mi dangin an thawh, hnathawh mumal awm si loa running bill pek leh thil dang ṭha lo a awm thu an sawi a, "A lungchhiatthlak tak zet a ni," an ti.
CYMA hruaitute'n press mite an kawm hnu, February 8 khan chief minister Zoramthanga chuan PWD hotute leh CYMA hruaitute a kâwm a; PWD-in contract a ziahpuite chuan an hna chin ṭha tak leh specification anga thawk zo tura hrilh an nih thu an sawi a, chutiang a nih loh chuan contractor-te chu 'blacklist' in, Mizoram sorkar hnuaia hna thawk thei tawh lo tura chhinchhiah an nih tawh tur thu tarlan a ni.
Kum 2017-a YMA General Conference-ah, 'Mizoram hmun hrang hranga inkalpawhna kan neihte hi tun aia ṭha leh changtlung zawka siam a nih theih nan CYMA-in hma la rawh se,' tia rèl a ni a; chumi bawhzuina atan chuan CYMA-in April 11, 2018 khan PWD chu memorandum of understanding a ziahpui a ni.