Party dang aia kan danglamna chu Phûrna leh thawhrimna - Lalduhoma

ZPM leader Lalduhoma chuan, tun dinhmuna party dangte aia ZPM party danglamna lian tak chu - an phûr te, an taimâkna leh an thawhrimnate a nih thu a sawi.

Lalduhoma hian nimin khan Champhaia Press Club-a ZPM zawm tharte lawm luhna inkhawmah thu sawiin, "Tun dinhmunah party dangte aia kan danglamna lian tak chu, kan phûr a, phûrna hian taimakna a hring a, kan thawkrim em em a, hei hian party dangte min beihna pawh a tisang a ni," a ti.

ZPM Leader chuan, ram siamṭha tur chuan politics ringawt a tâwk zo lo tih sawiin, "Pathian tel lo chuan kan ram hi kan ti dam zo lo ang," a ti a; MLA aṭanga bàn a nih avanga thlahualna a dawn ṭhinah lawmthu sawiin, eiruk sum ni lo, hmangaihna sum tling khawmin Serchhip biala by-election a hmachhawn dawn thu a sawi.

Lalduhoma hian ZPM zawm thar mi 306 a lawm lut niin ZPM thuchhuah chuan a tarlang a; a thlahualna atan Champhai district ZPM-in Rs. 35,000 an hlan tih a tarlang bawk.

Inkhawmah hian ZPM PAC member TBC Lalvenchhunga pawhin thu sawiin, "Dikna, rinawmna leh huaisenna nena hma lam kan pan chuan he ram hi ram nuamah kan la siam ang. Vai ration card nen chuan a huaisen theih loh a, rambuai hmaa Mizo pa ration card - buhzém kan rin lai chuan vai hoin min nék ngam lo, kan pi leh pute'n an nék zawk a ni," a ti.