Serchhipah chawimawina dawn lawm

Serchhip district ICDS Project-in Pradhan Mantri Matru Vandana Yojana (PMMVY) hnuaia Best Performance Award, 2018 leh Best Implementation Award 2017-19 an dawnte chu nimin khan Serchhip auditorium-ah lawm a ni a, district bawrhsap Kumar Abhishek-a'n a hmanpui.

Kumar Abhishek chuan, Serchhip ICDS thawktute thawhrimna fakin, "National award dawng thei khawpa in inpekna a chhuanawm tak zet. PMMVY scheme hi chhungkaw tin tana nute hlutzia leh chhuan awm zel tur hrisel zawk min hrinsak theih nana nau an pài laia an mamawh ei tur ṭha te, hahdamnate leh thil ṭul dang apiang pek chungchang a ni," a ti a; thawktute chu project huam chhunga nu nau pâi reng reng hmaih nei loa hmalak tum turin a chah.

Serchhip DC hian an district-a PMMVY kalpui tawh china anganwadi worker thawk ṭha thlan chhuah mi pathum hnenah lawmman a hlân nghal a ni.

PMMVY hi nu nau pâite ṭanpuina scheme a ni a, Mizoramah kalpui a nih aṭangin Serchhip district-ah nu 2,151 hnenah ṭanpuina pek a ni tawh a, pawisa sem tawh zawng zawng chu Rs. 94,90,000 a ni.