Rural Infrastructure Development Fund zirho

National Bank for Agriculture and Rural Development (NABARD) buatsaihin nimin khan Lunglei DRDA conference hall-ah sorkar official-te tan Rural Infrastructure Development Fund (RIDF) chungchang zirhona buatsaih a ni a, NABARD general manager SN Mallick-a'n a hmanpui.

SN Malik chuan, "NABARD kaltlangin Mizo­ram sorkar depart­ment hrang hrang Agri­culture, Horticulture, AH&Vety, PWD leh a dangte'n thingtlang hmasawnna ruhrel atana sum pek chhuah hmangin hma an la ṭhin a ni," a ti a; project siam dan azirin sum pek ṭhin a nih thu a sawi.

RIDF hi detailed project report (DPR) siam hmanga pek ṭhin a ni a, NABARD kaltlanga sum pûk chu kum khatah 2.7%-in a pung. February 15, 2021 thlengin Mizorama project 522 atana RIDF-in sum a pek tawh chu vbc. 1406.35 a ni a, kum 2020-21 chhunga Mizorama hman atan NABARD sum vbc. 160 ruahman a ni.

Lunglei district-a NABARD sum hmanga project siam ṭhenkhat tarlan a ni a; Lungpuizawlah AH&Vety in, Rabungah rural animal health centre leh Hnahthial-Thingsai, Zote (S)-Chhipphir kawng siamte a ni.