Adolescent Health Day hman a ni

Rashtriya Kishor Swasthya Karyakram (RKSK) hnuaiah nimin khan Hnahthial Higher Secondary School-ah 'Adolescent Health Day' hman a ni a, district bawrhsap Vanlalmawia'n a hmanpui.

Vanlalmawia chuan, mihring chher (human resource) chu khawvela resource ropui ber a nih thu sawiin, "Resource tam tak chu a nihna ang ngawt chuan a hman theih loh a, tihhmasawn a ngai a, chumi tur chuan mihring kan pawimawh. Kan taksa hi Pathianin thil ropui tak tih nan a siam a, chu chu tihhmasawn a nih loh chuan lei hnuaia rangkachak inphúm ang chauh a ni a, zirna hmangtein kan tihhmasawn a ngai a ni," a ti.

Khawvelah a thlàwna chaw dawn tur a awm loh thu leh thawh chhuah a ngaih thu sawiin DC chuan, "Eizawnna hi engtikah emaw chuan kan koah a innghat dawn a, kan tihmâkmawh tur a ni. Hringnun hi mumal taka a kal theihna turin ruahmanna kan neih a ngai a ni," a ti a; ṭhalaite chu hlawhtlinna nei turin nunphung hrisel an neih a ngai tih a sawi.

Adolescent Health Day hmannaah hian Hnahthial SP Lalbiakkila'n social media hman thiam a pawimawh chungchanga sawi a; district education officer Mickey Lalenkawla, medical officer Dr Zosangliani leh Dr R Lalsanglura ten 'Ruihhlo, tleirawl leh rawltharte hmelma' tih thupui an sawi bawk.