MIMER hming avangin harsatna awm lo MCI pawmpuina hmuh a la ni lo - Health department

August 2018-a hawn Mizorama medical college hmasa ber Mizoram Institute of Medical Education & Research (MIMER) hming, tuna sorkarin Zoram Medical College (ZMC) tia a hming thlak avangin sorkar laipui aṭangin Mizoram sorkarin harsatna a tâwk lo a, sum sen belh tur a awm thung.

RTI Act hmanga MIMER hming thlak chungchang Health & Family Welfare department-a zawhna, SPIO-in a chhannaah, MIMER hming thlak avangin harsatna a awm loh thu an tarlang. RTI Act zawhna hi July 3, 2019 khan chhanna pek chhuah a ni. MIMER hming aia ZMC hming phuah a nih hnuah central sorkar aṭangin Mizoram sorkarin harsatna tawh phahna a nei em, tih chu, "MIMER hming aia ZMC tia hming phuah a nih hnuah central sorkar aṭangin Mizoram sorkarin harsatna a neih hriat a ni lo," tiin chhan a ni.

Zawhna dang a chhannaah SPIO chuan, "Medical college hming MIMER aiah ZMC hming thlak a nih hian, Medical Council of India-in a pawmpui a ngai a, MCI-ah hian notification copy pek a ni tawh. MCI pawmpuina kan la dawng lo," a ti.

MIMER hming thlaka Zoram Medical College tia hming phuah hnuah hming thlak avang hian Mizoram sorkarin pawisa sen a neih phah em? pawisa sen a neih chuan cheng engzat nge a sen tawh? tia zawhna chu, "Mizoram sorkarin Falkawna Medical College MIMER hming thlakna Zoram Medical College tia hming a phuah hnuah hming thlak avang hian Mizoram sorkarin pawisa a sen tur zat a la hriat theih loh. Nimahsela, seal, staff ID, signboard, website domain, university affiliation thlakna, etc. te a ṭul avangin sum senna tur a awm dawn," tiin a chhang. 

ZMC tih a nih avanga research kawngah harsatna a awm phah dawn leh dawn loh chungchangah, SPIO chuan, "Thlen phah lo ang," tiin a chhang bawk.Hetih lai hian, kumin June thlaa Assem­bly budget session-a Health minister Dr R Lalthangliana'n ZPM member Lal­chhuanthanga zawhna a chhannaah, MIMER hming ZMC tia thlak a nih avangin chuti taka a ṭhat zawkna leh hlawkna sawi tur a awm loh thu a tarlang.

MIMER hming ZMC tia thlak chung­changah hian MIMER din laia chief minister Lal Thanhawla chuan na takin a lo sawisel tawh a, MIMER-ah MNF-te'n tha an thawh ve loh thu sawiin, "Thâ thawh miah lohna hming thlak hi thil tenawm tak a ni. Mi dangte'n theihtawp chhuah leh hah taka an sual chhuah sa, 'a hming lam a awl zawk' tih mai mai vanga a hming an thlak hi thil tenawm tak a ni a, mipui min zah lo hle," a ti. MIMER hming chu zirna sang zawk atan pawh hman theih tur leh nakin zel atan medical college aia ṭha zawk a nih theih nana a hming an phuah a nih thu a lo sawi tawh a ni. ZMC tia hming thlak chhan hi  chief minister Zoramthanga chuan Assembly session-ah June 26, 2019 khan chhangin, MIMER hming chu Aizawl Medical College leh Mizoram Medical College tia thlak rawt a nih thu sawiin, "Kan ti rau rau a nih chuan Burma, Manipur leh Bangladesh-a mite'n an intih tatu theihna turin Zoram Medical College tih rawt a ni. CM hming chawia ti anga sawite a awm ang ti an awm a, mahse, ZPM, ZNP leh ZDU-te pawh a awm a, Zoramthanga hming chawi a ni lo tih mipuiin an hre vek tho a ni," a ti.