Lok Adalat-ah thubuai 216 chingfel

July 13, Inrinni khan Mi­zoram hmun hrang hrangah Lok Adalat an ṭhu a, he Na­tional Lok Adalat-ah hian thubuai 521 ngaihtuah zinga 216 chinfel a ni.

Aizawl bikah chuan chaw­hma dar 11 aṭangin District Court-ah Lok Adalat an ṭhu a; chief judicial magistrate Sylvie Z Ralte-in kaihruaiin, advocate H Lalṭanpuia leh Vanneihtluanga te Bench-I ah an ṭhu a, Bench-II ah judicial officer Lalthansiami hoin advocate JC Lalnunsanga leh Lalhruaitluanga Ralte te an ṭhu thung. Aizawlah hian thubuai 71 ngaihtuah zingah 47 an ching­fel a, sum cheng nuai 12.4 chuang hmuh a ni.

Kolasib-ah chuan Bench pahnih siam a ni a, thubuai 36 an ngaihtuah zinga paruk an chingfel a; thubuai 22 chu leiba inṭhìnna a ni a, Rs. 4,56,500 hmuh let a ni. Kolasib-a National Lok Adalat hi Kolasib Diakkawn High School-a pawl 10 zirlaite'n an chhim. 

Mizoram State Legal Services Authority bultuma buatsaih National Lok Adalat hi district hrang hrangah a ruala neih a ni a, Mizoram pumah thubuai hrang hrang khawih a ni. Leiba kaihhnawih thubuai 330 zinga 157 chinfel a ni a, chuta ṭanga sum hmuh chu cheng nuai 272.50 chuang a tling. Civil case dang 190 zinga 59 chinfel a ni a, chutah chuan Rs. 7,00,000 chuang chinfel a ni bawk.

Lok Adalat hi court pang­ngaia inkhin ngai loa thubuai neite an inbiakremna tura tih a ni.