Chhimthlang lam mipuite'n tuilian leh leimin vangin harsatna an tawk

Tun hnaia ruahsur nasa vangin Mizoram hmun hrang hrangah chhiatna a thleng a, leimin leh tui lian vangin mi tam takin harsatna an tâwk a, mahni ina riak thei lo chhungkaw eng emaw zat an awm.

Ruahsûr nasa vangin Khawthlangtuipui chu Inrinni khan a len belh zel a, July 13, Inrinni khan Tlabung leh a chhehvelah chhungkaw 400 velin an chenna in an chhuahsan tawh. Nimin lamah erawh chuan tui chîm chin a san belh rih lo nia thu dawn a ni. Khawtlangtuipui hi kum tin deuh thaw a lian a, chenna in a chîm ṭhin a; kumina tuilian chîm chin chu nikuma a chîm chin aiin ft. 5 velin a la hniam zawka thu dawn a ni.

Tlabung aṭanga thu dawn danin, Tlabungah tuilianin chenna in a chîm avangin chhungkaw 150 vel chu an riak chhuak a; Tipperighat (Tuikukkai) khuaah chhungkaw 130 vel leh Tablabagh (Lamthai)-ah chhungkaw 80 vel an riak chhuak bawk. Tlabung leh Lungsen inkarah electric ban eng emaw zat a tlu a, hrui tam tak a chah bawk avangin Tlabung leh a chhehvel khuate'n kawlphetha an hmu thei lo.

Tlabung leh Lunglei inkar kawngpui pawh a ping mek a, Tlabung aṭanga Sihphirtlang km. 30 velah leiminin kawngpui hmun engemaw zatah a hnawh a ni. Khawthlangtuipui lian hi Lunglei district-ah pawh Sumasumi khua leh Belkhai khuate'n an tuar a, Sumasumi khuaah hian in 12 a chîm a, Belkhai khuaah in eng emaw zat a chîm bawk.

Lawngtlai district-a Ngengpui lui pawh Inrinni khan len belh zel mah se, nimin lamah erawh a len belh tawh rih lo. Ngengpui lui lian hian July 11 aṭang khan Ngengpuikai khua in 20 vel a chîm nia thu dawn a ni a, chhungkaw eng emaw zatin an in an chhuahsan phah.

Leimin leh lei tawlh vangin Serchhipah chenna in rauhsan chhungkua 10 an tlin tawh thu dawn a ni. July 12 leh 13-ah Serchhip  Saron Venga leimin leh lei tawlh vangin chhungkaw pasarih an inthiar chhuak a, a hmain chhungkaw ṭhenkhat an lo inthiar chhuak tawh. 

Serchhip Saron Venga leiminin a bula luikawrtê a hnawh pin avangin a thlang NH kawngpui lama awm Kaptluanga in, RCC building chhawng li dinnaah tuihâwk nasa takin a lut a, a chim hlauhthawn avangin Inrinni khan an bungrua thiar chhuah  a ni.

Serchhip Dinthar Vengah July 12, Zirtawpni zan dar 10:30 vel khan Lalduhawma in (RCC) sak lai chu a dinna lei a tawlh avangin a tlu a; a bula F Sawithanga in, assam type pawh tlu mai thei dinhmunah a ding. Darnam Vengah chenna in pakhat rauhsan a ni a, Tuikhuah Vengah pawh lei chêin a thlang lama NH-54 kawngpui a hnawh ping ṭhin bawk.

Bawngkawn Durtlang Road-a Surash Garti in kawmthlanga lung rem chu Inrinni zing dar 9:10 khan a chim a, a thlanga J Lalbiakmuana building panna kawng a hnawh ping a, building ṭhenkhat a déng chhia. Surash Garti in ban thlang lam a lan tawh avangin an inthiar chhuak nghal a; Aizawl deputy mayor Lalringliana'n a hmunah tlawhin, leimin zel tur ven nan silpauline a pe. 

Hnahthialah pawh Peniel Venga F Lal­thantluangi te in sak lai chu a dinna lei a chêt avangin nimin khan khawtlang hnatlangin an ṭhiat. F Lalthantluangi in dinna lei a che tih July 13 khan hriat a ni a, him zawkna atan nimin khan an ṭhiat ta a ni. An ṭhenawma H Lallungmuana in sak mek pawh senghawi a ni bawk.