KHAWTHLIR

Dawrpui Vengthar Branch KṬP chuan Inrinni khan an Kohhran Hall-ah blood donation camp an huaihawt a, Synod Hospital tan thisen unit 46 an pe a, a petute mipa 41 leh hmeichhia panga an ni. Lairam Isua Krista Baptist Kohhran (LIKBK) Ṭhalai Pawl, Sihtlangpui Bial pawhin Lawngtlai District Hospital tan thisen unit 20 an pe a, a petute mipa 18 leh hmeichhia pahnih an ni.

Tuithiang Veng leh Bethlehem Vengthlang inkal pawhna lei leh slab culvert chu Inrinni khan minister Robert Romawia Royte-in a hawng. Lei hi cheng nuai 40 senga dawh a ni a, ft. 42.64 a thui a, ft. 16.4 a zau a ni a, slab culvert hi cheng nuai 30 senga dawh niin, ft. 9.8 a thui a ni. Robert-a chuan Tuithiang Veng leh Chhinga Vengthlang inkal pawhna tur lei pawh dawh tum a nih thu a sawi. 

Mizoram Baptist Koh­hran hruaitute chuan tun hnai khan chief minister Zoramthanga an kâwm a; sorkar laipuiin Kristiante ni pawimawh leh hunpuia sorkar programme a siam ṭhin chu an ngaimawh thu an thlen a, chutiang thil a thlen tawh lohna tura hma la turin an ngen.

C Lalvunga lehkhabu ziah, 'Nghilh loh sûlhnu' tih chu July 12, 2019 khan Synod Conference Centre-a Pi Zaii Hall-ah Mizo Academy of Letters president Prof. Laltluangliana Khiangte-in a tlangzarh. 

Govt. Kolasib College chuan July 12 khan Diakkawn YMA Hall-ah graduate tharte chawimawina hun leh zirlai tharte lawmluh­na­ hun an buatsaih a, khuallian minister K Lalrinliana chuan zirlai kalkhawmte chu fuihna thu sawiin, "Zirna kawng hi tum mumal tak nei chunga awmze neia zawh a ngai a ni," a ti.

Tlawng lui a len avangin PHE department chuan fimkhur thilah Tlawng lui aṭanga tui pump chhuahna kháwl hlui zawk, Phase-1 khawl an hmang rih lo. PHE chief engineer C Lallunghnema sawi danin, Tlawng lui chîm chin sang zelin Phase-1 kháwl awmna a chîm mai hlauhthawnna avangin kháwl ṭhenkhat chu hmun him lama dah sawn a ni. Phase-2 hmangin dan pangngaiin an pump chhuak reng thung.