Aizawl traffic police-te an infuih

Aizawl Traffic Police-te chuan nimin khan Vanapa Hall-ah Aizawl Traffic Sammelan leh infuih tharna hun an hmang a, DIG (Northern Range) Lalbiakthanga Khiangte-in a hmanpui.

Inkhawm hi Traffic SP Ro­dingliana Chawngthu-in a kai­hruai a; Lalbiakthanga Khiangte chuan, traffic duty-te'n an duty laklawh laia an pute buai chung chunga an salute ṭhin chu a ṭul loh thu circular chhuah a nih tawh thu sawiin, "Duty hi hahthlak ṭhin viau mah se, zaidam hram hram tum tur," a ti a, traffic police-te chu dan kengkawhtu an nih avang­in zûk leh hmuamah pawh duty chhung chuan insúm turin a fuih.

Traffic Sammelan-ah hian Indian Reserve Police battalion hrang hrang, 1st Bn. MAP leh Mizoram Home Guard aṭanga traffic police-a awm tur mi 114-te chu hnathawh dan leh dan chi hrang hrang zirtir an ni.

Traffic officer-in-charge Lalṭanpuia chuan, traffic police-te chu mipui rawngbawltu an nih angin, an duty laiin ruih theih thil laka an fihlim ngei a ṭul thu a sawi a, an hna chu mipuite rawngbawlna a nih angin hawihhâwmna zir thar turin a fuih.

Deputy SP K Laltluangliana pawhin thu sawiin, traffic police-te chu dan leh hrai hre chiang turin a chah a, "Dan in hriat chian chuan dan kenkawh kawngah huaisenna a pe dawn che u a ni," a ti. Inkhawma an tarlan danin, Aizawla kawngpui sei zawng chu km. 297-a chhût a ni a, Transport department-ah ni tin motor 40-45 register thar ang a ni. Nitin taxi 2,800 leh two wheeler taxi 495 an tlan chhuak ziah anga chhût a ni bawk.