Lungleiah zirlai tiṭha chawimawi

MSU Regional Hqrs., Lung­lei chuan July 12 khan Lunglei Convention Centre-ah zirlai tiṭha chawimawina hun an buatsaih a, Lunglei HPC vice chairman Lawm­awma Tochhawngin a hmanpui.

Lawmawma Tochhawng chuan zirlaite fuihna thu sawiin, "Chawimawite hian a tawp an thleng ta tihna ni loin an kal zelna tur atan chawimawina an dawng a ni tih inhria se la, an kal zelna tur­ah taimakna leh ṭhahnem­ngaihna nen ke an pen a ṭul a ni. Eng dinhmunah pawh ding se lehkha zir theia an awmna chhan an nu leh pate chu zah a, chawimawi a pawimawh. Hlawhtlinna changtuten chhungkua bakah kan ram leh kan chenna district hre reng a, ram nghahfak kan ni tih inhriat fo a tul a ni," a ti.

Zirlai chawimawite hi Lungleia college hrang hrang leh Lunglei mi Lunglei pawn college aṭanga zirlai ti tha zual mi 17 an ni a, chawimawina thuziak hlan theuh an ni.