Bhanubhakta Acharya piancham lawm

Inrinni khan Mizoram hmun hrang hrangah  Gorkha hnam zinga thu leh hla lama puipa bera ngaih, Adikavi Bhanubhakta Acharya piancham vawi 205-na ‘Bhanu Jayanti’ chu lawm a ni a, Aizawlah chuan Central Mizoram Gorkha Youth Association (Central MGYA) huaihawtin lawm a ni.

Bhanu Jayanti lawmnaah hian Adikavi Bhanubhakta Acharya thuziak zirho a nih bakah Gorkha hnam lam chi hrang hrang te entir a ni a, zirlai tithate chawimawina hun hman a ni bawk. He ni pual hian kar hmasa July 7, 2019  khan Zarkawt Recreation Centre, Babutlang-ah ‘Sahitya Gosthi’ hman a ni bawk.

Adivaki Bhanubhakta Acharya  piancham hi Kolasibah chuan St. Joseph Parish Hall-ah lawm a ni a, bialtu MLA K Lalrinliana'n a hman pui. K Lalrinliana chuan Gorkha-te chu khawvel pumah hnam huaisen leh hnam rinawm tia hriat­lar an nih thu sawiin, "Gorkha hnam nunze mawi entawn tlak tamtak a awm a, chungte chhawm nung zel se midang tan malsawmna nih chhunzawm zel ang che u," a ti.