Lunglei district-ah 2018-2019 chhungin kum khat hnuai lam mi 39 an thi
Lunglei district chhunga naupang kum khat hnuai lam thi (infant death) chungchang tun hnai khan Lunglei additional DC David Liansanglura hoin thlir lêt a ni a; kum 2018-19 chhung khan naupang kum khat hnuai lam mi 39 an thih thu tarlan a ni.
Meeting-ah hian, Mizoram mipui an hrisel zawk nan Health department chauh ni loin, line department leh tlawmngai pawlte nena thawhhona ṭha tak neih a pawimawh thu sawi a ni. Vanduai vang ni lo, inthlahdah vanga thi an awm ṭhin chu pawi an tih thu te, damlote'n an damloh chhan hre turin an damlohna mila doctor pan tur thlan a pawimawh thute an sawi bawk.
Midangte tana malsawmna ni thei turin naupang thi palite nu leh enkawltu doctor-ten an damlohna chhan leh eng vanga thi nge an nih sawina hun an hmang a, nikum aia ṭha zawk leh naupang thi an tlem theih nan ṭan lak a ngaih thu tarlan a ni bawk.