Khawkawn MHIP-in zu an dap

Manipur aṭanga Mizorama zu lak luh nasat ṭhin avangin Khawkawn Branch MHIP bultumin tunlai hian Tuivai leiah zin veivâkte'n zu an hawn leh hawn loh an endik ṭhin. Khawkawn aṭanga thu dawn danin, Khawkawn nia insawiin mi ṭhenkhatin Manipur aṭangin Mizoramah zu an la lut ṭhin a ni.

Khawkawn Branch MHIP secretary Lalbuatsaihi chuan, "A bul ṭan nan kan khua tihhmingchhiat duhtute dap chhuak turin Manipur ramrîah MHIP bultumin V/C leh YMA-te nen kan duty a, kan zu mante chu Tuivai luiah kan leihbaw nghal zel a ni," a ti.

Lalbuatsaihi chuan, "Kan sorkar chak tak hian  Excise checkgate min dahsak ngei se kan duh hle. Ramri depa awm khua kan ni a, sorkarin zu khapna dan hman a tum meknaah hian, a kal kân khua kan nih avangin MHIP-te hi hetiang hian kan che ta mai a ni," a ti a; sorkar thâ tichak turin nuho an pên chhuah thu a sawi.