Cabinet-in Law Commission siam chungchang ngaihtuah dawn

Union cabinet chuan Law Commission siam dan chungchang a ngaih­tuah thuai dawn nia sawi a ni. 

Nikum August 31 khan Justice BS Chauhan (retd.) kaihhruai, 21st Law Commi­ssion kum thum term hi a tawp a, hemi hnu hian Commission hi chhun­zawm a ni tawh lo. Law ministry chuan panel din thar lehna tur hian rawtna thlen mah se, Lok Sabha inthlan a nih chhoh avangin ngaihtuah zui lohin a la awm. 

Sorkar lam aiawh chuan panel din thar lehna tur hi Union Cabinet hmaah pharh a ni thuai dawn tih a sawi. Law Commisison hi Supreme Court judge hlui emaw, high court chief justice hlui emawin an ho ṭhin. 

Kum 2015 khan law panel hi act of Parliament emaw, executive order (resolution of union cabinet) emaw kaltlangin permanent body-a siam rawt a lo ni tawh a, mahse Prime Minister Office-in system hman mek hi hman chhunzawm a duh zawk avangin he rawtna hi dahṭhat rih a ni.