Mizoram sorkar zualkona Supreme Court-in a hnâwl
Supreme Court-a Mizoram sorkar zualkona thu, technical course zir tur thlannaa Chakma-te Category-I atanga paih tura a dilna chu Supreme Court chuan thu tling loah ngaiin a hnawl.
Higher & Technical Education (HTE) department chuan kum 2015 khan The Mizoram (Selection of Candidates for Higher Technical Courses) (Sixth Amendment) Rules, 2015 a tichhuak a; Category-I ah Chakma-te dah a nih loh avangin Mizoram Chakma Students' Union (MCSU)-te'n Gauhati High Court-ah PIL an thehlut a ni. Rules chu Mizoram sorkarin July 16, 2015-ah a hnûk kîr a, Chakma-te chu Category-I ah a dah zui avangin High Court pawhin PIL chu a titawp zui.
HTE department chuan April 20, 2016-ah Mizoram (Selection of Candidates for Higher Technical Courses) Rules, 2016 a tichhuak leh a, Chakma-te chu Category-II ah dah an ni. Chakma-te Category-I aṭanga paih an nih avangin MCSU chuan Gauhati High Court-ah PIL an thehlut leh a, MSCU petition thehluh chu June 24, 2016-ah High Court chuan ngaihtuahin, Court-in a chinfel hma chuan hmang rih loh turin Mizoram sorkar a hriattir a, May 2, 2018 khan order tichhuakin, MCSU-in PIL an thehluh vanga The Mizoram (Selection of Candidates for Higher Technical Courses) Rules, 2016 hman theih rih loh tura a dah (stay) chu a sût a, thubuai ngaihtuahnaah MCSU ukilte an inlan ngai loh vanga sut niin tarlan a ni.
High Court thutlukna avangin The Mizoram (Selection of Candidates for Higher Technical Courses) Rules, 2016 hmangin HTE department chuan Mizoram quota-a MBBS leh BDS zir turte thlanna a chhunzawm nghal a, MCSU-te chu Gauhati High Court-ah an zualko leh a, High Court chuan tribal ṭheuh ṭheuh chu ang khata inen turin thutlukna a siam ta a; Chakma-te chu Category-I ah dah turin court chuan a rel.
Gauhati High Court thutlukna chu Mizoram sorkar chuan Supreme Court-ah a khing lêt ve leh a, Supreme Court chuan nimin khan thutlukna a siamin; Gauhati High Court judgement chu awmze nei taka siam a nih thu a tarlang. Mizoram sorkarin a khin lêtna chu contempt of court-ah a ngai a, thubuai chu a titawp zui a ni.
Hetih lai hian, HTE department chuan, Mizoram quota-a technical course hrang hrang zir tur thlanna chu Cabinet thuchhuak angin a kalpui mek a, kalpui zel pawh a tum. July 8, 2019-a Council of Ministers ṭhukhawm chuan The Mizoram (Selection of Candidates for Higher Technical Courses) Rules, 2016 chungchang a ngaihtuah a; Rules hnuaia Mizoram quota - Category-I a dil theite 'Indigenous people' tiha inziak chu 'Zo Ethnic' bak Mizoramah 'Indigenous people' an awm loh avangin 'Zo Ethnic' pual atan a dah a ni.