Tharum hmanga ramri buai Chinfel kan tum lo - Home Minister

Home minister Lalchamliana chuan, ramri buai chu tharum hmanga chinfel an tum loh thu a sawi. Hetih lai hian, MZP chuan, July 17, 2019 ral hmaa Bairabi Zophai hmunah Mizoram sorkarin Zofate Chawlhbuk a sak loh chuan July 19, 2019-ah 'Ram chhan kawngzawh' huaihawt an tum.

Home Minister hian nimin khan an party pisa Mizo Hnam Rûnah thu sawiin, "Assam nen kan ramri chungchang hi July 8 khan chief minister Pu Zoramthanga hoa Council of Ministers ṭhukhawm chuan Bengal Eastern Frontier Regulation, 1873 hmanga 1875-a notification chhuah kha kan pawm dan a ni. Ramri buai hi tharum hmanga chinfel kan tum lo," a ti.

Ram leh ram, state leh state inkar ramri buai chu chinfel har tak a nih thu sawiin Lalchamliana chuan, "State leh state inkar ramri tidanglam theitu chu Parliament a ni. Mizote'n ramria kan pawm chin hi kan hlen chhuah theih nan all party, all NGO-te nen sorkarin ṭangho turin ke a pên ang," a ti a; ramri issue chu Mizo leh Mizo inbeih nan hman loh a duh thu a sawi.

Home Minister chuan, political party-te'n ramri buai chu political ball-ah hmang lo se a duh thu sawiin, "I inlungrual tlang ang u. Union territory kan nih aṭang ringawt pawh khan kum 47-na a kal tawh a, party hrang hrangin sorkarna an insiam chhâwk a, thil khirhkhân tak a nih avangin tumahin kan ramri buai hi an hun lai ṭheuhin an la tifel lo a ni," a ti.

Disaster Management & Rehabilitation (DMR) changtu ni bawk Lalcham-liana chuan, tun hnaia ruahsûr vanga chhiatna hrang hrang thleng tuartute chu thinlung tak a tawrhpui thu a sawi. DMR Minister sawi danin, tunlaia ruahsurin Tlabung leh a chhehvela khaw 32 a khawih a, in 700 vel chîm tawhin, chu'ng zinga 330 chu a chîm pil tawh. Chhungkaw 700 velin chenna in an rauhsan a, relief camp 42 siamin, sorkarin a theih ang angin a buaipui mek a ni.

Hetih lai hian, ramri chungchang leh Zophaia chawlhbûk sak chungchanga Vanglaini palai zawhna chhangin MZP President L Ramdinliana Renthlei chuan, July 17 hmaa Bairabi Zophaiah Zofate Chawlhbuk sak a nih loh chuan July 19-ah 'Ram chhan kawng zawh' huaihawt an tum thu a sawi a, "Kan thil phût chungchangah sorkar aṭangin engmah kan la dawng lo. MZP chu kan dinna ngaiah kan la ding," a ti.

L Ramdinliana Renthlei sawi danin, Council of Ministers ṭhukhawmin Mizoram ramri atana an pawm Bengal Eastern Frontier Regulation, 1873 ang chuan Lailapur leh Vairengte inkara sipai cinema hall hlui leh Bairabi Zophai hmuna Zofate Chawlhbuk an sakna hmunte chu Mizoram chhung vek a ni.