SEDP-ah sorkar hnathawkte pawhin Mau an chíng thei dawn - CM Zorama

Chief minister Zoramthanga chuan, Mizoram sorkar flagship programme SEDP-ah mau ṭha chi chîn a ni dawn a, sorkar hnathawkte pawhin an duha ram an neih chuan an chíng thei dawn niin a sawi.

Mizoram Horticulture depertment tun hnaia Agriculture Today buatsaih Best Horticulture State Award a dawn chu nimin khan Horticulture changtu CM Zoramthanga hoin an lawm a; Zoramthanga chuan, "Mizoramah thlai leh thei chi hrang hrang intodelh turin hma kan la dawn a, buh leh thlaia intodelh turin ram kan ngah tâwk a, leileta siam theih ram hectare 70,000 kan nei a ni... Kum rei loteah sorkar hnathawk hlawh aiin sum an lak luh tam zawk dawn avangin, IAS pawhin an hna an bànsan duh hial ka ring," a ti.

Chief Minister chuan, Mizoramin Best Horticulture State Award a dawng chu Horticulture department thawkte thawhrim vang a nih bakah, sorkar hmasaa Chief Minister leh Horticulture Minister-te hmalakna rah a nih thu a sawi.

Horticulture department chu Mizoram intodelhna turah a pawimawh zel dawn tih sawiin Zoramthanga chuan, ei leh bara intodelh turin Mizoramin asset a neih ṭhat thu leh Agriculture department leh Horticulture department-te'n Mizoram economy an siam danglam theih nan thûk zawka inpe turin thawktute a chah.

Chief Minister chuan, Horticulture department chu Bamboo Development Scheme kalpuitu tur a nih avangin, thawktute chu thâ thlah loa an thiamna leh theihnate ṭangkai taka hmang chhunzawm zel turin a fuih bawk. Award dawn lawmna hi Horticulture secretary Sangdingliana'n a kaihruai a; director Dr E Saipari'n award an dawn chhan sawiin, chawimawina chu mimal award ni loin, kut hnathawktute zawng zawng thawh chhuah a nih thu leh, kum 2020 ral hmain kum khata a hmun ngaiah thlai vawi hnih chîna thar theih turin hmalak a nih tur thu a sawi.

Inkhawmah hian Horticulture Development Board vice chairman Prof. F Lalnunmawia leh Bamboo Development Board vice chairman Dr K Pachhunga te pawhin thu an sawi a ni.