KHAWTHLIR

United Nations-in tualṭo hnamte chungchanga inhmuhkhawmna Expert Mechanism on the Rights of Indigenous Peoples (EMRIP) chu nimin khan Geneva, Switzerland-ah a buatsaih ṭan a, sawm an nih angin ZORO consultant pahnih - Lallian Puia Sailo leh Lalruatpuii te an tel. EMRIP hi UN hnuaia Human Rights Council-in tualṭo hnamte chanvo chungchang ngaihtuah tur bika a din a ni a, session neih mek hi July 19, 2019 thleng neih tur a ni.

Serchhip DC Sangchhin Chinzah hoin nimin khan DC meeting room-ah kumina Serchhipa Independence Day hman dan tur sawiho a ni. Meeting-a an rêl dan chuan, Independence Day hi chawhma dar 11 aṭangin Khawtetlang Field-ah hman tur a ni a, parade contingent 17 awm tura ruahman a ni.

Aizawl DC chuan thupek chhuahin, fûr ruahtui tlâk tam lai a nih avangin, lei laih vanga chhiatna a thlen loh nan Aizawl district-a kawngpui pawimawh chhehvelah reng reng, DC emaw, Saitual leh Sakawrdai bial chhunga anmahni awptu Sub-Divisional Magistrate aṭanga phalna la hmasa lo chuan lei laih khap a nih thu a puang. Thupek hian BRTF leh PWD hnuaia hnathawh a huam lo.

Aizawl district chu páwn lama inthiarna awm lohna, Open Defecation Free (ODF) district-a puan a nih hnuah, nimin khan Aizawl DC Vanlalngaihsaka hnenah ODF certificate hlan a ni. PHE-in kum 2012-a a zir chian danin, Aizawl district-a thingtlang (rural area)-ah chhungkua 17,328 an awm a, chhungkaw 1,517-te'n inthiarna hmun mumal an nei lo. Swachh Bharat Mission (Gramin) hnuaiah hmalak a ni a, Ministry of Drinking & Water Sanitation chuan March 18, 2017 khan ODF-ah Aizawl district chu a rawn puang a; tehna hrang hranga state level team-te'n an endik leh hnuah, December 6, 2018 khan ODF-ah puan a ni leh bawk.