MPC hruaitu thlanin ZPM a nghawng lo - Lalduhoma

ZPM leader Lalduhoma chuan, tun hnaia MPC party-te inthlang thar chuan ZPM-ah a chhe zawngin nghawng a neih loh thu a sawi. "MPC-te ZPM huang chhunga pawl pakhat a ni a, hruaitu an inthlan thar a hun vangin an inthlang thar a, mawhphurhna an inbel fel hunah ZPM chungchanga thutlukna an siam mai dawn a ni," a ti.

Nimina ZPM pisaa inkhawm­ah Lalduhoma chuan, thu sawiin, "MPC-te dinhmun kan hriatthiampui a, hun an mamawh a,  ZPM party-a tel chungchang pawh an hotute’n an la rel ang; lungrual takin ZPM-ah kan awmho ngei kan beisei" a ti. Lalduhoma chuan, "ZPM MLA-te chu nomination file hmain thlan tlin kan nih chuan ZPM-ah rinawm taka ding tlat tura thutiam nghet tak nei kan ni," a ti a; Mizoram politics chungchang ngun taka an thlir reng thu a sawi.

ZPM Leader chuan, ramri chungchang ngun takin kan thlir reng thu sawiin, "Party mal hamṭhatna atan ringawt politics hi khel lo tur leh, ram leh hnam himna tak tak ngaihtuah turin party dangte ka ngen duh. Thu dik zîktluak sawia mipuite hnenah thil nihna dik tak pawh sawi ṭhin turin ka ngen duh bawk,” a ti.

Lalduhoma chuan, MNF leh India sorkar inremna, Memorandum of Settlement-ah Mizoram state hminga high court leh university ziah tel leh tel lohin kawngro a su lo tih sawiin, "MoS duan a nih laiin India sorkar aiawhte chuan high court leh university-te hi state sorkarin a ken tel niin an sawi a, Pu Denga khan a ken tel sa a nih chuan ziah lan ve hrim hrim a phût tlat avangin ziah lan a ni," a ti a; MNF hotute phût vanga telh a nihna aiin, state sorkarin a ken tel a nih thu a sawi.

Inkhawmah hian ZPM PAC member VL Remruata pawhin thu sawiin, hotute remruat anga party pakhata inchhûng khawm vek tur leh July thla chhunga inpeih vek tura ngenna chungchangah, inpeih lo an la awm avangin party mal harsatna inhriatthiampui a ṭul thu a sawi a, "ZPM-te kan inlungrualzia leh inhmangaihzia lantir hun lai tak a ni a, rah duhawm zawk chhuah tur chuan dawhtheihna nen puitling taka nghah ngai kan nghah a ṭul. Inhmangaihna nen he ram hi Pathian duh danin kan siam dawn a ni," a ti.