Fisheries sangha chi sem an la duh lo

Fisheries department chuan nimin zing khan Serchhipah sangha chî (notê) sem an tum a, mahse, sanghate chu an têt lutuk avangin sangha dil neite'n an la duh lo.

Serchhip aṭanga thu dawn danin, Fisheries department hian kum 2018 chhung khan Serchhipah sangha chi leh a chaw an sem lo a, kuminah sem turin Serchhip District Fisheries Association (SDFA)-in department hotute an ngen. Fisheries department hotute'n Serchhipah sangha chi sem tur chu pakhat Re. 1-a khul tur niin an sawi a, sem tura tihte chu MP inthlan vuakvêtah sem theih a nih loh chhungin an lo ṭhang lian hman a, supplier-in Re. 1-in a phal tawh lo a, chuvang chuan, a aia tê a supply ta a ni, an ti.

Sangha chi chu millimeter 80-100 inkara lian supply tur a ni a, tuna supplier-in sangha chî a kente chu mm. 80 a tling lo hle a ni. Chuvang chuan, sangha chi lei tura kalkhawmte chuan SDFA hruaitute kaihhruainain bán pharin a duh leh duh lo vote an la a, 95% velin an lâk duh loh thu an sawi avangin sangha chi chu an sem thei ta lo.

SDFA hruaitute chuan, nghakhlel taka an lo thlir sangha chî, a têt lutuk vanga sem loha kîr a ngai chu pawi an tih thu sawiin, sangha chi supplier chu a rang thei ang bera supply order-a inziak anga finger link (inchi 2 leh a chanve) vel tal supply leh thuai tura an phût thu an sawi. Sangha chi chu Indian major carp ni lo, common carp leh grass carp-te supply ni se an duh thu an sawi bawk.