Khawthlangtuipui lianin in 700 vel a chîm

Khawthlangtuipui lian chuan chenna in 700 vel a chîm tawh. Tuilian vanga harsatna sukiang tura hmalak zel dan tur leh buaina lian zawk thleng palh thei ven dan tur sawi hoin nimin khan Tlabung SDO(C) Henry C Lalrawnkima hoin Tlabung Sub-Division Disaster Management Committee an ṭhukhawm.

Henry C Lalrawnkima chuan, tuilian vanga harsatna tâwkte chhawmdawl tura mi tlawmngaite inpekna fakawm a tih thu sawiin, "Pathian zarah nunna chán leh hliam kan awm lo a, hei hi kan zavaia thawhhona leh ṭan tlanna vang a ni," a ti a;  ṭanpui ngaite ṭanpui tura YMA-te hnathawh chu chhuanawm a tih thu a sawi.

Tlabung SDO(C) chuan, Committee hnuaia team hrang hrangte'n khuarel chhiatna thlen laia an mawhphurhna ṭheuh an hriat chian a ṭul thu a sawi a; khuarel chhiatna chu eng hunah pawh thleng thei a nih avangin, mahni hma zawna tih tur ṭheuhte inpekna nena hlen turin kal khawmte a chah.

Meeting-ah hian, khuarel chhiatna vanga mipui tawrhna tinêp tura hmalak dan tur ṭha zawk nia an hriat te, rawtna leh ruahmanna ṭha zawka an hriatte an sawi a; mawhphurhna hrang hrang chelh tura ruat thar ṭul an tih 

ṭhenkhatah rawtna siam a ni bawk.

Tlabung SDO(C) tarlan danin, an hriat theih chinah, Khawthlangtuipui lian mekin chenna in 700 vel a chîm a, chu'ng zinga chenna in 330 vel chu tuiin a chîm pil vek a ni. Hetih lai hian, Khawthlang­tuipui lian chu nimin lam khan tlémin a kám hret a, mahse, chenna in tam tak a la chîm. July 14, Pathianni khan Tlabung V/C huam chhunga kohhran tinin chhûnah biak-in an khâr vek a, zanah chuan kohhran ṭhenkhat an inkhawm thung. Nimin khan Tlabung V/C huaihawtin tuilianin a kâmsan khawlai thianfaiin khawtlang hnatlang an nei a ni.