ZOTE HONDA ṬHAZUAL FAKNA-ah Amtea 'Lunghlu' a hlu zual zel

Zote Honda Ṭhazual fakna chart-ah chart hmasa lama roreltu bawkin ro a rel leh a, Amtea tluk thei an la awm lo.

Amtea hla thar lam rem tak mai 'Lunghlu' hian thlan a hlawh zual zel a, a zawnin chart-ah roreltu a ni thei a, eng chen nge he dinhmun hi a luah zel dawn tih chu hriat chakawm tak a ni. He hla mawi tak mai hi  May thlaa a tihchhuah tawh kha a ni a, tihchhuah a nih hnu lawk aṭangin Ṭhazual chart hi a luah nghal a, tunah chuan a zawna dinhmun sang ber luah thei tlemte zingah a tel phak tawh a ni.

'Lunghlu' hi Amtea hian Canadian Christian rock band Hawk Nelson hla 'Dia­mond' a lehlin a ni a, Music track mawi tak hi Lal K Sailo kutchhuak a ni thung. Music video siam lama hnuhma nei ṭha berte zinga mi Andrew Lalbiakkima Ralte chuan video hi a siam sak a, en manhla tak a ni. Wardrobe hi Achhani Inno­vative Dresses a ni bawk.

Amtea chuan, "Lalpa hian he hla hmanga min zirtir a tum ber chu, lung­hlua min siam vek hi a ni. Lunghlu pawh mei alh sa tak hmangtein an buatsaih a, chutiang tho chuan Lalpa hian harsatna hrang hrang hmangin lunghlu mawi taka kan chhuah theih nan min buatsaih ṭhin a ni," tiin a hla chungchang hi Vanglaini a lo hrilh tawh a ni.

Chart hmasa lama pa­thumna Malsawm­dawng­kimi 'A lo kal thuai dawn' tih chuan hma sawn zelin pathumna aṭang­in pahnihnaah a rawn inhlangkai. Malsawm­dawg­kimi hla mawi tak mai hian hma a sawn chho hret hret zel a, eng chen nge a thlen dawn tih chu hriat a chakawm tawh hle. 

Malsawmdawngkimi 'A lo kal thuai dawn' tih dawt chiahah hian Chart hmasa lama palina Ocean Avenue 'Lalpaah lawm la' tih chu a awm ve thung a, anni pawh hian hma an sawn chho zel a, an dinhmun an sawh nghet mek zel a ni.

Chart-a hmahruaitu hial pawh lo ni tawh Praise On star- Arini, Cindy leh Zorina-te zai hi mipuiin an ngaithla kham thei lo tih a hriat a, hun rei tak hnuah pawh chart-ah palina an la ni phak a ni. 

Lalthlengliani 'A him reng dawn si' tih chu pa­ngana­ah a awm thung a, hma a sawn ve zel. Chart hmasa lama pariatna Ruthi CVL Muanpuii 'Bible' chuan a dinhmun rawn sawh nghet zelin paruknaah a rawn inhlangkai dawrh bawk.

Esther Khiangte 'An eng reng ang' chuan a dinhmun ngai luahin pasarihnaah a awm chhunzawm a, Daisy L Khawbung 'Thlarau Thianghlim' chu pariatnaah a awm thung.

Ṭhazual Chart-ah hmel thar hmuh tur a awm a, chu chu tudang ni loin tunlaia Gospel band kan neih ṭhat ber zinga mi The Prophets-te an ni. Anni hian an hla 'Mangang Authawm' chu pakuana an rawn nihpui a, he hla mawi tak mai hian belhchian a dawl hle. Chart-ah pawh dinhmun a sawh ngheh chhoh zel a rinawm.

Tunlaiah chart-ah a bikin rock band lang an awm khat hle a, The Pro­phets hian an hla thar mawi tak mai hi eng chen nge an thlenpui ang tih chu hriat a chakawm tawh hle. R. Lalruatsangi chuan a hla 'Lawmna chibai' tih hmangin Top 10 a rawn khar leh a, chart hmasa lamah pawh khan ani hian Top 10 hi a khar tawh bawk a, a dinhmun ngai a rawn luah ve leh bawk a ni.