KHAWTHLIR

Ministry of Home Affairs chuan nimin khan Indian Police Service (IPS) officer, DGP ni tawh ṭhenkhat a síksawi a; Arunachal Pradesh DGP ni lai SBK Singh chu Mizoram DGP tura tih a ni. Mizoram DGP ni lai Balaji Srivastava chu Puducherry DGP-ah a awm ang. Mizoram DGP thar tur SBK Singh hi 1988 batch IPS a ni.

Farm Veng ṬKP unit chuan nimin khan an kohhran hall-ah blood donation camp an huaihawt a, Lunglei Civil Hospital tan thisen unit 19 an pe a, a petute mipa 16 leh hmeichhia pathum an ni. Aizawl Civil Hospital-ah individual donor 10 an awm bawk.

Mizoram Kailawn 2019: Business Plan Contest hmanga entrepreneurship chawikanna leh inelna buatsaih tur chungchanga inhrilh-hriatna leh zirtirna hun nimin khan Champhai College-ah buatsaih a ni. He hunah hian self help group, sumdawnna lama tuimite, NGO leh college zirlaite an tel a, Mizoram Kailawn chungchanga hriattur pawimawh hrang hrangte an zirtir. Mizoram Kailawn 2017 leh Mizoram Kailawn 2018-ah diltu mi 620 chuang an awm a, chung zinga mi 83 chu boot camp-a tel tura thlan an lo ni tawh.

Mizoram Police chuan Tlabung khuaa Khaw-thlangtuipui lian tuarte ṭanpuina atan Ex-gratia Relief Fund aṭangin Rs. 20,000 an hlan. Ṭanpuina hi Tlabung Police Station-a officer-in-charge Liansanga'n Tlabung Branch YMA president Zokunga Sailo hnenah a hlan a ni.