Mipuiin sorkar ṭha an neih theihna atan Hmanrua nih kan tum - ZPM

Zoram Peoples' Movement (ZPM) hruaitute chuan nimin khan Aizawl Press Club-ah thuthar thehdarhtute an kâwm a; ZPM chu Election Commission of India (ECI)-in political party anga a pawm (registration a pek) tawh thu an puang a, "Mizo mipuite'n sorkar ṭha an neih theihna atan hmanrua nih kan tum," an ti.

ZPM chairman Lalliansawta chuan, ECI chuan July 3, 2019-ah ZPM chu Mizorama regional party pakhat ni turin an ziah luh thu sawiin, "Mizorama political party zingah piang tlai ber kan ni chungin, Mizoram Legislative Assembly-ah member pasarih kan nei a, opposition party zinga a lian ber kan ni ve mek a ni," a ti a; tuna an dinhmuna hlángkaitu Pathian leh mipui chungah thinlung taka an lawm thu a sawi.

ZPM Chairman sawi danin, Mizoram Assembly inthlan zawh tâkah ZPM chu an la inpeih hman lo hle a, movement ang chauha inthlan hmachhawn an ni chungin MLA bial pariatah mipuite'n hnehna an chantir a, constituency 10-ah pahnihnaah an awm thung. Inthlan result hian Mizoram mipuite'n sorkar ṭha an duh a, an rualawt tak zet tih a lantirah an ngai a ni.

ZPM chu tunah chuan political party pakhat angin sorkar thar din turin party kalphung danglam tak neiin an inbuatsaih thei tawh dawn a, tun aṭanga rei lo têah headquarters-ah mawhphurhna insiam thar a ni dawn tih an sawi.

Kum 2023-a Mizoram Assembly inthlanpui hmachhawn tura inbuatsaihna hun kum li leh a chanve la awmah Mizoram mipuite'n an beisei sorkar ṭha an neih theihna turin hmanrua nih an tum thu sawiin Lalliansawta chuan, "Kohhran, tlawmngai pawl, sorkar hnathawk leh thuthar thehdarhtute mittlung taka inbuatsaih kan duh," a ti.

ZPM Chairman chuan, hun kal tawha an tihsual leh ṭawng sual zawng zawngah mipui ngaihdamna a dil a, ZPM chu ngil taka an kal theihna atan thurâwn pe ṭhin turin mipui a ngen a ni. ZPM-a Mizoram People's Conference (MPC) an tel dawn leh dawn loh zawhna chhangin ZPM MLA VL Zaithanzama chuan, "MPC chuan Assembly nei a, hruaitu thar thlan hnuah hruaitu tharte kutah ZPM-a tel leh tel loh chu kan dah a ni," a ti.

MPC vice president atana thlan thar Lalthansanga pawhin, ZPM zawm leh zawm loh chu MPC hruaitu atana thlan tharte thutlukna tur a nih thu sawiin, "Hruaitu tharte hi kan la in form lo a, ZPM zawm leh zawm loh hi ngaihtuahna hun pawh a la awm lo," a ti a; MPC Executive ṭhutkhawm hunah ZPM zawm leh zawm loh chu agenda-ah a awm tur thu a sawi.

ZPM Chairman sawi danin, ZPM hi pawl paruk intél khawm an ni a, ZPM-a inchhûnfin an duh leh duh loh zawh vek niin, pawl panga chuan an remti tawh a ni.