Tlawng luia tla zawn hna tihtawp a ni

July 11, 2019 chawhnu lama Tlawng luia tla C Lalfakzuala (53) s/o LN Tluanga (L), Govt. Complex, Aizawl chu khawtlang huapin ni sarih chhung zawn a nih hnuah pawh hmuh a nih loh avangin nimin tlai dar 3 khan khawtlang huapa zawn hna tihtawp a ni. Sihhmui kâia innghah khawmna bika mi thil phalte sum pek tling khawm chu Rs. 1,70,000 chuang a tling.

C Lalfakzuala a náwlpuia zawn khârna inkhawm hi Sihhmui-Lengpui Tlawng kaiah Central YMA ruahmannain hman a ni a, Sairang bialtu pastor-in hunserh a hmang. CYMA aiawh te, C Lalfakzuala chhung te, Electric Veng YMA leh Govt. Complex YMA aiawhte'n thu an sawi a ni.

C Lalfakzuala u, Dr C Lalzirliana chuan, an chhungkaw chhiattawha mi tlawmngai thawk chhuak, thâ leh zung, sum leh pai sêngtu zawng zawng chungah an lawm thu a sawi. Tlawng lui Sihhmui kâi bakah, ruang zawn chhunga innghah khawmna hrang hrang - Nghalchawm kâi, Sairang, Sairang Dinthar, West Serzawl kâi, Mualkhang, Khamrang, Hortoki leh Bairabi kaiahte pawh khârna hunserh hman a ni.

Tarlan tawh angin, C Lalfakzuala hi July 11 chawhnu lam khan mi dang pahnihte nen Tlawng lui Nghalchawm kâiah mau pûmin an inkar a, an mau pum chu a darh avangin luiah a tla a ni. CYMA ruahmannain Aizawla YMA branch hrang hrangte leh Tlawng lui hnaiha awm khaw hrang hranga mi tlawmngaite'n chhùn zàn zawmin an zawng a; Mizoram chhunga Tlawng lui dung zawng zawng bakah, Tlawng luiin Tuiruang (Barak) lui a finna bul thlengin zawn ni mah se, nimin tlai thleng khan an hmu zo ta lo a ni.