Lal Thanhawla MPCC President a ni zel dawn

Mizoram Pradesh Congress Committee (MPCC) president atan Lal Thanhawla a ni zui zel dawn a; vice president atan H Liansailova leh treasurer atan Zodintluanga, MLA-te an ni dawn.

Thu dawn danin, Congress party hi July 24, 2019 khian an inthlang dawn a, president, vice president leh treasurer turte thlan tur a ni. He inthlan atana chuh tura hming pek luh theih hun chu July 16, Thawhlehni tlai dar 3 khan a tawp. Inthlan turah hian president atan president ṭang lai Lal Thanhawla, vice president atan treasurer ṭang lai H Liansailova leh treasurer atan Zodintluanga te chiahin hming an pek luh avangin chuhpuitu an awm lo.

MPCC elected office bearer post pathum chuh turte hi MPCC extended OB meeting thutlukna anga chuh an nia thudawn a ni. July 24-a an inthlan turah hian Executive Committee member chuh tura hming pe mi 91 an awm bawk. MPCC-ah hian Executive Committee-ah member mipa 50 leh hmeichhia 10, an vaiin mi 60 awm tura tih a ni.