Ramria sorkar hmalakna duhkhawp lo MZP-in kawngzawh an huaihawt dawn

Mizo Zirlai Pawl (MZP) chuan ramri chungchanga Mizoram sorkar hmalakna an duhkhawp loh avangin naktuk July 19, Zirtawpni hian Aizawlah 'Ram chhan kawngzawh' an huaihawt dawn. Kawngzawh an huaihawt tur chungchang hi MZP hruaitute chuan nimin khan Aizawl Press Club-ah thuthar thehdarhtute an hrilh.

MZP president L Ramdinliana Renthlei chuan, Bairabi Zophaia Zofate Chawlhbuk an sak, an sak aṭanga rei lote hnua Assam Police leh Forest department-in an ṭhiah thu sawiin, "A hnua chawlhbuk sak leh tum zirlaite leh anmahni ṭawiawmtute vuak leh silaia kah hial an tawh laiin chhantu kan nei lo. Chutih laiin, tun hnaia Vairengte daia sipai cinema hall hlui Assam Forest-te'n sa ṭha a, office atana an luah nghal thei kha pawi kan ti hle," a ti.

Mizoram sorkara an thil phût - July 12, 2019 ral hmaa sipai cinema hall hluia Assam Forest mi leh sate chhuahtir leh, chhuahtir an nih loh chuan Zophaia Zofate Chawlhbuk sa tura Mizoram sorkar an phûtna chu tihhlawhtlin a nih loh thu sawiin MZP President chuan, "Kan thil phût chungchangah hian sorkarin min chhanna an nei lo," a ti a; an lo rêl tawh angin, kawngzawh an huaihawt dawn thu a sawi.

'Ram chhan kawngzawh' hi chawhma dar 11-ah ṭan tur a ni a, Khatla kâwn leh Zarkawt kâwn aṭanga zawh ṭan tur niin, Vanapa Hall-ah intawhkhawm tur a ni. MZP President sawi danin, kum 2018 khan Bairabi Zophaia MZP-te hmalakna avangin sorkar laipui auh ei a ni tawh a, sorkar laipui kaihhruaina hnuaiah Mizoram leh Assam-te nen meeting neih a ni ṭhin. Inner Line Reserve Forest area square mile 509 chhunga dan loa awm in leh huan leh ramte enfiah ni se tih a ni a, hmun eng emaw zat enfiah a ni tawh.

Phaisen area enfiah a nih dawnah duh dan a inan loh avangin ramri enfiah hna chu chhunzawm theih a ni ta lo a, sorkar laipui hotute chuan Mizoram team lam chu, 'In sorkar hotute nen in ram china in pawm han sawi fel ula, min lo hrilh leh ang a, kan inbe leh dawn a nia,' an ti. Mizoram leh Assam ramri chungchanga inbiakna chu Mizoram sorkar kutah a táng ta rih a ni.

Mizoram sorkar thar, MNF ministry-a thuneitu Chief Minister, Home Minister leh Kolasib Bialtu MLA pawh ramri chungchang vawi tam tak an sawipui tawh tih sawiin L Ramdinliana chuan, "Mizoram-Assam ramri chungchang ngaihtuahtu tur committee sang Core Committee din thar leh a ni a, meeting pawh neih tawh niin, chanvote pawh insem a ni," a ti.

MZP President chuan, MZP chu Mizoram ramri chungchanga document an neih angte la khawm tura tih an nih angin, document an lak khawmte chu April 16, 2019-ah Core Committee Chairman hnenah an thehluh tawh thu a sawi a, "Kan thehluh aṭangin hmalakna hmuh tur a awm zui ta lo," tiin, Core Committee chu nimin (July 17)-a an ṭhutkhawm pawhin hmalakna sawi chhuah a awm loh thu a sawi.

MZP hruaitute chuan, Mizoramin a ram chin a chàn belh zel loh nan leh pi leh pute luah chin ram Mizoram chin humhalh a, neih let leh ngei theih nan hma an lak zel dawn thu an sawi a, "Mizoram leh Assam ramri chungchanga hmalakna hi mimal hamṭhatna tur leh political advantage-a lak chi a ni lo," an ti. An hmalaknaah Mizo mipuite ṭanrualpuiah an sáwm a ni.