KHAWTHLIR

Mizo 4th Indian Reserved Police battalion, Mamit Luangpawla mite chuan Mamit Zone Football Tournament-ah 2nd Division-a an champion lawm nan nimin khan 4th IR Multipurpose Hall-ah blood donation camp an huaihawt a; Mamit District Hospital tan thisen unit 33 an pe a, a petute mipa 31 leh hmeichhia pahnih an ni.

Information & Public Relations departmemt chuan Mizoram Calendar 2020-a dah turin thlalak thehluh hun a hawng a, July 31, 2019 thleng a duh apiang tan deputy director K Vanlalsangi hnenah thlalak thehluh theih a ni. IPR department chuan, Mizoram Calendar-a thlalak dah turah kum dang zawng aia uluk tum a nih thu an tarlang a, "Thlalak chu RAW format-a thehluh tur a ni a, RAW-a thla la thei lo tan original jpeg image thehluh tur a ni. Thlalak khawih danglam (edit) pawm a ni lo," an ti.

Ministry of Social Justice hnuaia National Institute of Social Defence bultumin nimin khan Serchhip SP pisa conference hall-ah damdawi hman sual leh ruihhlo do dan tur zirhona buatsaih a ni.

Economics & Statistical department buatsaih, Serchhip District Statistical Handbook, 2018 chu nimin khan district bawrhsap Sangchhin Chinzah-in DC Conference Hall-ah a tlangzarh. Handbook hi phek 82-a chhah, Rs. 50 man a ni a; Serchhip district bik handbook hmasa ber a ni. Tlangzarhnaah hian Serchhip-a sorkar officer te, tlawmngai pawl aiawhte leh chanchinbumite an tel.

Tourism minister Robert Romawia Royte chuan, China thlenga ke a kal Mizo hnam pasalṭha puala inhmuhkhawmna, Meet the Heroes: Peace Pays Organizing Committee chu nimin khan a pisaah a kâwm a, committee member 15 an tel. Tourism department hmalaknain ‘Meet the Heroes: Peace Pays’ hi August 8, 2019-ah Aizawlah hman tura rêl a ni a, ram leh hnam tana nunna thâp leh hlânte chawimawina hlan tum a ni.