Kumin chhungin Champhai district-ah Ruihhlo Rs. 9,79,60,800 hû man tawh

Champhai district-ah kumin chhungin, January aṭanga nimin thleng khan ruihhlo - heroin, ganja, methamphetamine leh pseudoephedrine Rs. 9,79,60,800 hu an man tawh.

Nimin khan Ministry of Social Justice hnuaia National Institute of Social Defence (NISD) bultumin Champhai SDPO pisa conference hall-ah Champhai district-a police-te damdawi hman khawloh laka inven dan tur zirtirna, ni thum awh tur an buatsaih a; Champhai chief judicial magistrate Lalrochami Ralte-in a hmanpui.

Zirhonaa course coordinator Francis Lalnuntluanga Ralte, Champhai additional SP tarlan danin, January 1 - July 16, 2019 chhungin Champhai district-ah heroin kg. 1.926, Rs. 69,56,800 hû te, ganja kg. 108.43, Rs. 5,48,000 hû te, methamphetamine kg. 29.228, Rs. 3,90,00,000 hû leh, pseudoephedrine kg. 335, Rs. 5,14,56,000 hû man a ni a; a vaiin Rs. 9,79,60,800 hû a ni.

Champhai Addl. SP chuan, training-ah hian damdawi leh ruihhlo dang, ṭhalaite suata Mizo ram leh hnam rûn mektu beih dan turte zir a ni dawn tih a sawi a; police zingah ruihhlo laka fihlim lo tam tak an awm avangin ruihhlo do kawngah inzirtirna leh infuih tharna buatsaih a pawimawh lehzual tih sawiin, "Mizoram kaltlanga ruihhlo tam tak tawlh zinga a tam ber chu Champhai district kaltlanga lo lut a nih ngei a rinawm a, a ven kawngah Champhai police-te'n ngawrh takin kan bei a ni," a ti.

Francis Lalnuntluanga Ralte chuan, Champhai district-ah police 163 an awm mek thu leh, Champhai Police Station chu India ram puma ti ṭha tehnaah 19-na leh India hmarchhak bikah pakhatna a nih thu a sawi bawk. Champhai CJM Lalrochami Ralte chuan, damdawi hman sual hluar zelin chhungkua leh khaw­tlang mai ni lo, police-te ngei pawh a kan kai zel avangin ruihhlo do kawnga inzirtirna buatsaih a ṭul thu a sawi a, "Damdawi leh a kaihhnawih hman sual hian rûkrûk leh tualthahna a tipung a, do lêt turin khawtlang anga ṭan rual a hun tawh tak zet a ni," a ti.

Lalrochami Ralte chuan, India ramah Mizoram chu NDPS hmanga thubuai ziah luhah hremna lekkawh ṭha ber zinga mi a nih thu sawiin, "NDPS case 91% chu hremna pek a ni. Police, Excise, NGO, mipui leh Court-te inkara thawhhona ṭha awm vang chauh a ni a, thawhhona ṭha tak awm mek hi chhunzawm zel ni se a duh­awm ngawt ang," a ti a; National Crime Bureau Report, 2013-ah Mizoram chu conviction rate sang ber a nih thu a sawi bawk.

Training-ah hian Champhai district-a police 40 an tel a, mithiam hrang hrangin thubuai hmachhawn dan an sawi a ni.